Margt bendir til þess að bankar séu farnir að verða tregari til þess að lána fé til hótelframkvæmda en áður. Þetta kemur fram í Markaðnum í dag. Þar segir að dæmi séu um tafir á hótelframkvæmdum á höfuðborgarsvæðinu í allt að 12 mánuði þar sem erfiðlega hefur gengið að fjármagna verkefni sem snýr að hótelbyggingum. Þá eru teikn á lofti um að breytingar séu að verða í ferðaþjónustunni og að afbókunum fari fjölgandi og ferðamenn leiti á önnur mið vegna þess háa verðlags sem einkenni ferðamannaiðnaðinn hérlendis, og ljóst að bankarnir haldi að sér höndum til þess að takmarka áhættuna á útlánatapi. Sviðsmyndagreining Seðlabankans hefur þó leitt í ljós að ólíklegt sé að bakslag í greininni tefli stöðu bankanna í tvísýnu.