Allt ferlið í kringum deiliskipulag við Elliðaárdal ber vott um að mikið hafi legið á og var málið keyrt í gegn á bak við luktar dyr án aðkomu almennings. Þetta var meðal þess sem fram kom í máli Eyþórs Arnalds borgarfulltrúa Sjálfstæðisflokksins í síðdegisútvarpinu í dag en hann var gestur Péturs Gunnlaugssonar.
Ferlið unnið í öfugri röð
Eyþór bendir á að áður en málið hafi verið samþykkt hafi nokkur fjöldi athugasemda borist borgaryfirvöldum en þeim hafi ekki einu sinni verið svarað áður en málið var keyrt í gegn
“ það lá svo mikið á að það var ekki búið að svara athugasemdum áður en málið var keyrt í gegn á lokuðum fundi í borgarráði, lokuðum fundi þar sem ekki má vitna í það sem sagt er, lokuðum fundi þar sem Sjálfstæðismenn einir gátu greitt atkvæði á móti meirihlutanum, fundi sem almenningur hefur engan aðgang að„,segir Eyþór.
“ það hefðu verið eðlileg vinnubrögð að svara þessum athugasemdum, til dæmis þeim sem bárust frá Umhverfisstofnun og fjölmörgum öðrum aðilum áður en þetta er samþykkt, en þetta er gert alveg í öfugri röð, fyrst er komið fram með vilyrði til ákveðinna aðila, síðan er farið í skipulagið og síðan er farið að svara athugasemdum, þetta var gert ákkúrat öfugt„,segir Eyþór.
Hlusta má á þáttinn í spilaranum hér að neðan.