Forseti Íslands og forsetafrúin halda í opinbera heimsókn til Eistlands

Guðni Th. Jóhannesson forseti Íslands og Eliza Reid forsetafrú munu í dag halda í opinbera heimsókn til Eistlands, en heimsóknin mun standa yfir til 23.júní. Með í för verður Lilja Alfreðsdóttir mennta- og menningarmálaráðherra auk embættismanna og aðstoðarfólks. Tilefni heimsóknarinnar er 100 ára lýðveldisafmæli Eistlands en Eistar munu halda mikla lýðveldishátíð af því tilefni.
Fram kemur í tilkynningu frá forseta að heimsóknin hefjist með formlegri móttökuathöfn við forsetahöllina í Tallinn að morgni fimmtudagsins 21. júní og mun forseti þá eiga fund með Kersti Kaljulaid, forseta Eistlands.
Þessu næst mun forseti skoða miðstöð Atlantshafsbandalagsins í vörnum gegn tölvuglæpum í borginni, eiga hádegisverðarfund með Eiki Nestor forseta Riigikogu, eistneska þingsins, og annan með Jüri Ratas forsætisráðherra. Þá verður farið í Mannréttindamiðstöðina í Tallinn og minningarsetur tónskáldsins Arvo Pärt en um kvöldið sóttir tónleikar í listamiðstöðinni Kultuurikatel áður en gengið verður til hátíðarkvöldverðar í boði forseta Eistlands. Föstudaginn 22. júní halda forsetahjónin til Tartu og snæða þar ásamt öðrum þjóðhöfðingjum hádegisverð í boði borgarstjórnar Tartu.
Þennan dag er átjánda skiptið sem háskólanemar Eystrasaltslanda efna til söng- og danshátíðar, sem þeir kalla Gaudeamus, og hófst sú hefð að safna þannig saman ungu fólk frá þessum grannríkjum árið 1956. Meðal tiginna gesta, sem reiknað er með að sæki viðburðinn að þessu sinni, eru auk forseta Eistlands og Íslands, forsetar Finnlands, Georgíu, Lettlands, Litháens og Póllands. Eftir hádegisverðinn heimsækir forseti Íslands Háskólann í Tartu og á þar fund með nemendum en því næst er haldið í þjóðminjasafnið sem hlaut tilnefningu sem Minjasafn Evrópu 2018. Um kvöldið munu gesti fagna blysgöngu Sönghátíðarinnar á bökkum Emajogi árinnar þar sem kórar, dansarar og gestir safnast saman og gleðjast.
Næsta dag verður haldið til Tallinn og þar munu forseti Íslands og forsetafrú kveðja gestgjafa áður en haldið er heim á leið til Íslands.