Landspítala var ekki gert viðvart um gerlamengun

Hvorki Heilbrigðiseftirlitið, Veitur né borgaryfirvöld gerðu Landspítala viðvart um að neysluvatn innihéldi jarðvegsgerla yfir leyfilegum mörkum þegar mengunarinnar varð vart. Fram kemur á fésbókarsíðu Landspítalans að stjórnendur spítalans hafi fyrst heyrt af gerlamenguninni í fjölmiðlum líkt og aðrir landsmenn þrátt fyrir að tekið væri sérstaklega fram í tilkynningum að þeir sem veikir væru fyrir þyrftu að gæta varúðar. Ekki hafa fengist skýringar á hvers vegna Landspítalanum var ekki gert viðvart og enn er óljóst hvort, hvernig og þá hvenær aðrir spítalar og hjúkrunarheimili hafi fengið viðhlítandi upplýsingar um mengunina. Í tilkynningunni á fésbókarsíðu spítalans eru starfsmenn jafnframt beðnir um að sjóða allt neysluvatn.