Sigurður Ingi Jóhannsson samgöngu- og sveitarstjórnarráðherra hefur ákveðið þær breytingar á gjaldskrá Herjólfs að sama fargjald verði fyrir ferðir milli lands og Eyja hvort heldur siglt er til Landeyjahafnar eða Þorlákshafnar, það þýðir að sama gjald verður fyrir einstaklinga og fólksbíla burtséð frá því í hvaða höfn verður siglt.Hingað til hefur fargjald verið nokkru hærra á leiðinni milli Vestmannaeyja og Þorlákshafnar en til Landeyjahafnar. Gjald fyrir farþega til Landeyjahafnar er kr. 1.380 aðra leiðina og með bíl er það alls kr. 3.600 en gjaldið til Þorlákshafnar hefur verið kr. 3.420 fyrir farþega og 6.840 ef farþeginn er með bíl. Framvegis verður því sama gjald fyrir ferðir Herjólfs og hefur gjaldskrárbreytingin þegar tekið gildi, breytingin tekur þó ekki til atvinnubifreiða.
