Taka upp hagsmunaskráningu ráðuneytisstjóra og aðstoðarmanna ráðherra

Ríkisstjórnin hefur ákveðið að taka upp hagsmunaskráningu fyrir ráðuneytisstjóra í Stjórnarráði Íslands og aðstoðarmenn ráðherra. Þetta var ákveðið á ríkisstjórnarfundi í morgun. Í nýlegri skýrslu GRECO var athygli íslenskra stjórnvalda vakin á því að ástæða kunni að vera til að láta hagsmunaskráningu ná til þessara starfsmanna með hliðsjón af eðli starfanna og nálægð við vald ráðherra.
Fram kemur í tilkynningu að fyrst um sinn verði hagsmunaskráningin valkvæð þar sem skylda til skráningar þyrfti að eiga sér skýra lagastoð. Forsætisráðuneytið mun útbúa eyðublað fyrir ráðuneytisstjóra og aðstoðarmenn ráðherra vegna hagsmunaskráningar, sambærilegt því sem ráðherrar fylla út og bjóða þessum starfsmönnum að fylla þau út. Forsætisráðuneytið mun taka við útfylltum eyðublöðum, fara yfir upplýsingar og leiðbeina hlutaðeigandi um hvort þörf sé á ráðstöfunum vegna mögulegra hagsmunaárekstra.

Upplýsingarnar ekki birtar opinberlega

Þá kemur fram að um tilraunaverkefni sé að ræða og ekki sé gert ráð fyrir að upplýsingar sem verða til við þessa skráningu verði birtar opinberlega. Í tilkynningunni segir að tilgangurinn sé fyrst og fremst sá að efla vitund starfsmanna um mikilvægi þess að afstýra hagsmunaárekstrum og bjóða þeim ráðgjöf í vafatilvikum.

Athugasemdir

athugasemdir