Ungum öryrkjum með meðfæddar skerðingar fjölgar

Félagsvísindastofnun Háskóla Íslands hefur skilað niðurstöðum rannsóknar sem framkvæmd var fyrir velferðarráðuneytið í þeim tilgangi að fá innsýn í aðstæður ungs fólks með örorku- eða endurhæfingarlífeyri, kanna reynslu þess af stuðningi sem það hefur fengið og fá ábendingar um hvað betur mætti fara. Rannsóknin var tvíþætt, bæði megindleg og eigindleg, og beindist að fólki á aldrinum 18–39 ára með geðraskanir eða stoðkerfissjúkdóma samkvæmt örorkumatsskrá Tryggingastofnunar ríkisins sem hafði fyrst verið metið til örorku eða endurhæfingar á árunum 2012–2015. Meðal þess sem rannsóknin leiddi í ljós er að sú fjölgun ungra öryrkja sem átt hefur sér stað á undanförnum árum hefur fyrst og fremst verið í hópi þeirra sem eru með meðfæddar skerðingar, (svo sem einhverfu eða þroskaröskun) fremur en þeirra sem hafa vegna stoðkerfis- eða geðsjúkdóma þurft að hverfa frá námi eða starfi. Þetta er meðal annars rakið til mikillar fjölgunar einhverfugreininga á undanförnum árum.