Heilbrigðisráðherra Þýskalands, Karl Lauterbach, talar um skaðlegar aukaverkanir Covid-bólusetninga. Þvílíkur kórónuviðsnúningur! Þetta er ein stórkostlegasta breyting sem orðið hefur á afstöðu eins stjórnmálamanns í ár og mættu aðrir ráðamenn í heilbrigðismálum á Vesturlöndum læra af þessum þýska kollega sínum. Í stað þess sem áður var, að smala fólki með reglum, þvingunum og lokunum til að taka mRNA lyf í tilraunaskyni gegn Covid, þá ræðir heilbrigðisráðherrann um skaðlegar aukaverkanir bóluefnanna og hvað gera megi til að vinna gegn þeim.
Þýska Bild fjallar um viðsnúning ráðherrans í dag. Sjónvarpsstöðin ZDF tók viðtal við Lauterback í gær þar sem ráðherrann skrifaði kórónusögu. Karl Lauterbach 60 ára og fulltrúi þýska sósíaldemókrataflokksins SPD talar núna hreint út um fólk sem veiktist alvarlega eftir Covid-bólusetningu:
„Þessi örlög eru mjög átakanleg og hver einustu örlög eru einum of mikil. Ég vorkenni fólkinu mikið. Það sem meira er, þetta eru alvarlegar aukaverkanir og sumar hverjar verða varanlegar.“
Beitti áður þrýsting gegn óbólusettum
Lauterbach vill núna hjálpa því fólki sem hefur orðið fyrir tjóni vegna bólusetningar en nýlega vildi hann knýja fólk til að láta bólusetja sig. Lauterbach vill að skaðinn af aukaverkunum bóluefnanna verði viðurkenndur fljótar en nú er gert svo hægt sé að meðhöndla þá sem verða fyrir aukaverkunum bæði fyrr og betur.
Lauterbach var einn stærsti talsmaður almennrar Covid-bólusetningar. Þar sem þvingandi bólusetningar voru ekki leyfðar, þá beitti hann þrýstingi. Óbólusettir borgarar voru útilokaðir frá stórum hluta opinbers lífs með s.k. 2G reglu sem þýddi, að viðkomandi varð að sýna fram á að vera fullbólusettur og hafa náð sér eftir Covid sjúkdóminn til að fá að vera á opinberum stöðum. Lauterbach vildi líka láta bólusetja börn sem veiktust mjög sjaldan alvarlega af Covid. Viðsnúningur ráðherrans er því algjör.
