Pétur Gunnlaugsson ræddi við Heiðu Björgu Hilmisdóttur borgarstjóra í síðdegisútvarpinu um Borgarlínuna og framtíð almenningssamgangna í Reykjavík. Í umræðunni kom skýrt fram að borgaryfirvöld telji ekki lengur raunhæft að gera ráð fyrir bílastæðum sem sjálfgefinni forsendu í allri nýrri uppbyggingu og að sú afstaða sé grundvallarbreyting í skipulagi borgarinnar, Borgarlínan sé að mati borgarstjóra forsenda þess að draga úr þörf fyrir bílastæði. Hlusta má á þáttinn í spilaranum hér að neðan.
Segir bílastæðahugsunina komna að þolmörkum
Borgarstjóri sagði að Reykjavík væri komin að raunverulegum mörkum hvað varðar rými fyrir bíla og bílastæði. Lengi hafi verið gengið út frá því að hver íbúð og hvert atvinnuhúsnæði þyrfti eigið bílastæði en sú forsenda stæðist ekki lengur í þéttbýlli og vaxandi borg. Hún sagði að ekki væri unnt að fjölga bílastæðum endalaust án þess að fórna borgarrými loftgæðum og lífsgæðum íbúa.
Skipulag tekur mið af breyttum ferðavenjum
Í samtalinu kom fram að nýtt skipulag endurspegli breyttar forsendur þar sem gert er ráð fyrir færri bílastæðum við nýbyggingar. Borgarstjóri sagði að þetta væri ekki gert til að þrengja að fólki heldur til að laga skipulag að raunveruleikanum. Hún benti á að borgin yrði að skipuleggja sig út frá fleiri ferðamátum en einkabílnum einum og skapa aðstæður þar sem ganga hjólreiðar og almenningssamgöngur væru raunhæfir kostir í daglegu lífi.
Áhrif á byggingaraðila og markaðinn – íbúðir seljast ekki vegna skorts á bílastæðum
Borgarstjóri viðurkenndi að þessi breyting hefði haft áhrif á byggingaraðila sem í sumum tilvikum ættu erfiðara með að selja íbúðir þar sem bílastæði væru fá eða engin. Hún sagði þó að borgin gæti ekki haldið áfram að skipuleggja byggð með það að markmiði að mæta kröfum markaðarins um bílastæði ef það gengi gegn heildarhagsmunum borgarinnar. Að hennar mati væri þetta óhjákvæmilegur hluti af breyttri borgarþróun.
Borgarlínan forsenda breytinga
Í umræðunni var Borgarlínan nefnd sem lykilforsenda þess að draga úr þörf fyrir bílastæði. Borgarstjóri sagði að með sérakreinum og forgangi í umferð gætu almenningssamgöngur orðið áreiðanlegur valkostur sem fólk treysti til daglegra ferða. Án slíkra umbóta væri óraunhæft að gera kröfur um færri bílastæði en með bættum almenningssamgöngum breyttust forsendurnar.
Valfrelsi í stað einnar lausnar – fólk með börn vill einkabílinn
Pétur gerði athugasemd við svar borgarstjóra og benti á að fjölskyldur með börn ættu erfiðara með að fara á milli staða án einkabílsins. Borgarstjóri lagði áherslu á að markmiðið væri ekki að banna bíla heldur að auka valfrelsi. Með því að styrkja almenningssamgöngur og draga úr bílastæðaskyldu gæti borgin létt á umferð og um leið bætt aðgengi fyrir þá sem þyrftu á bíl að halda. Hún sagði að þetta væri leið til að gera borgina bæði skilvirkari og mannvænni.
Loftgæði, öryggi og framtíðarsýn
Borgarstjóri sagði að fjölgun bíla og bílastæða hefði bein áhrif á loftgæði og umferðaröryggi og bitnaði einnig á neyðarþjónustu. Forgangsakreinar almenningssamgangna gætu nýst slökkviliði og sjúkraflutningum og þannig aukið öryggi allra. Hún taldi að Reykjavík yrði að horfa til framtíðar og skipuleggja borgina út frá þeim takmörkunum og tækifærum sem væru raunverulega til staðar.
Hlusta má á ítarlegri umfjöllun í spilaranum hér að neðan