Pétur Gunnlaugsson ræddi við Ragnar Árnason, hagfræðing og prófessor emerítus í síðdegisútvarpinu um Borgarlínuna, samgönguframkvæmdir á höfuðborgarsvæðinu og fjármögnun verkefnisins. Ragnar sagði að Borgarlínan væri mjög óhagkvæm framkvæmd og vísaði til skýrslu sem unnin hefði verið fyrir RSA um valkosti í almenningssamgöngum. Hann sagði að samkvæmt útreikningum skýrslunnar hefði Borgarlínan neikvætt núvirði upp á um 210 milljarða króna. Hlusta má á þáttinn í spilaranum hér að neðan.
Aðrar samgöngulausnir bæði ódýrari og hagkvæmari
Fram kom í máli Ragnars að hægt væri að ná sambærilegri þjónustu í almenningssamgöngum með svokölluðu hraðvagnakerfi án þess að ráðast í jafn kostnaðarsamar framkvæmdir og Borgarlínuna. Hann sagði að samkvæmt þeim forsendum sem lagðar hefðu verið til grundvallar í RSA-skýrslunni væri stofnkostnaður Borgarlínunnar um 130 milljarðar króna. Þegar rekstrarkostnaður, áhrif á aðra umferð og ávinningur notenda væru reiknuð saman væri niðurstaðan neikvætt núvirði upp á um 210 milljarða króna miðað við 6,5% ávöxtunarkröfu.
Kostar 1. milljón króna á hvern íbúa
Sú niðurstaða þýddi í reynd að samfélagslegur ávinningur verkefnisins stæði ekki undir kostnaðinum. Hann bætti við að þessi fjárhæð jafngilti um 1 milljón króna á hvern íbúa höfuðborgarsvæðisins miðað við þær takmörkuðu upplýsingar sem fást uppgefnar um kostnaðaráætlun í dag.
Gagnrýnir rekstrarforsendur og vegtolla
Í viðtalinu sagði Ragnar að rekstrarkostnaður Borgarlínunnar yrði líklega mjög hár. Hann sagði að núverandi strætókerfi væri þegar rekið með miklum halla og að notendur greiddu aðeins um fjórðung til þriðjung af raunverulegum kostnaði hverrar ferðar. Samkvæmt þeim tölum sem Ragnar vísaði til, kostaði hver ferð í núverandi kerfi um 1.500- til 2.000 krónur á meðan farþegar greiddu sjálfir aðeins um 500 til 700 krónur. Hann sagði að Borgarlínan yrði að öllum líkindum ekki rekin hagkvæmar en núverandi kerfi og gæti jafnvel orðið dýrari í rekstri.
Líklegt væri að mati Ragnars að framkvæmdin yrði fjármögnuð með vegtollum eða öðrum álögum á almenna bílaumferð. Hann gagnrýndi þá nálgun og sagði ósanngjarnt að meirihluti íbúa bæri kostnað af kerfi sem nýttist tiltölulega fáum. Í viðtalinu kom einnig fram að Ragnar teldi erfitt að fá skýrar upplýsingar um heildarkostnað verkefnisins þar sem forsendur og áætlanir væru oft óskýrar eða dreifðar milli stofnana og ráðgjafa.
Hlusta má á ítarlegri umfjöllun í spilaranum hér að neðan.