Arnþrúður Karlsdóttir ræddi við Brynjar Níelsson, nýkjörinn borgarfulltrúa Sjálfstæðisflokksins í síðdegisútvarpinu um húsnæðismál, fjölskyldustefnu, leikskólamál og skipulagsákvarðanir í Reykjavík. Þar kom fram gagnrýni á hvernig borgaryfirvöld hefðu forgangsraðað í skipulags- og þjónustumálum undanfarin ár og ungt fólk ætti sífellt erfiðara með að eignast húsnæði og stofna fjölskyldu. Hlusta má á þáttinn í spilaranum hér að neðan.
Húsnæðismarkaðurinn þjónar ekki þörfum ungs fólks
Í viðtalinu sagði Brynjar að eitt mikilvægasta verkefni næstu ára væri að tryggja ungu fólki raunhæfan möguleika á að koma sér þaki yfir höfuðið. Hann sagði að skipulagsstefna borgarinnar hefði í of miklum mæli byggst á pólitískri hugmyndafræði fremur en þörfum fjölskyldna og fólks með meðaltekjur.
Að mati Brynjars hefði þróunin á húsnæðismarkaði gert mörgu ungu fólki erfitt fyrir að stofna fjölskyldu eða eignast börn. Hann sagði að byggt hefði verið húsnæði sem hentaði illa daglegum þörfum fjölskyldna, meðal annars vegna skorts á bílastæðum og skipulags sem tæki ekki mið af raunverulegum aðstæðum fólks.
Vill sveigjanlegri leikskóla og meiri hverfaþjónustu
Brynjar gagnrýndi einnig hvernig leikskólamálum hefði verið háttað í Reykjavík. Hann sagði að borgin hefði lagt ofuráherslu á stór og kostnaðarsöm leikskólahús í stað þess að byggja upp sveigjanlegri lausnir innan hverfa. Hann sagði mikilvægt að foreldrar gætu fengið daggæslu nær heimili sínu og nefndi þar bæði dagforeldra og smærri leikskólaeiningar. Að hans mati þyrfti þjónustan að taka mið af þörfum fjölskyldna fremur en pólitískum sjónarmiðum.
Í viðtalinu kom einnig fram gagnrýni á aukna gjaldtöku og álögur á borgarbúa. Brynjar sagði hugmyndir um vegtolla fela í sér nýja skattheimtu á fólk sem þyrfti að ferðast um borgina vegna vinnu eða daglegra erinda.
Gagnrýnir að starfsemi Samhjálpar hafi verið ákveðin við Grensásveg
Arnþrúður ræddi einnig við Brynjar um áform um starfsemi samhjálpar við Grensásveg og andstöðu íbúa við staðsetninguna. Brynjar sagði mikilvægt að hjálpa fólki sem glímdi við fíknivanda og félagslegan vanda, en taldi jafnframt að taka yrði tillit til íbúðaumhverfis og öryggis. Þetta fyrirkomulag geti beinlínis verið hættulegt íbúum.
Hann sagði að íbúar hefðu upplifað að ekki væri hlustað á sjónarmið þeirra og nefndi nálægð við skóla, leikskóla og íþróttastarfsemi barna. Að hans mati hefði borgarstjórn of oft tekið ákvarðanir án nægilegs samráðs við íbúa og fyrirtæki. Brynjar sagði að niðurstöður kosninganna sýndu að margir borgarbúar vildu meiri sátt og meira samtal í skipulags- og þjónustumálum Reykjavíkurborgar.
Hlusta má á ítarlegri umfjöllun í spilaranum hér að neðan.