Brottfall laga um Bankasýslu ríkisins birt í samráðsgátt

Til stendur að leggja niður Bankasýslu ríkisins og hefur frumvarp þess efnis verið birt í samráðsgátt stjórnvalda. Um stofnunina eru sérstök lög sem lagt er til að verði felld úr gildi. Verkefni stofnunarinnar munu við það flytjast til fjármála- og efnahagsráðherra.

Áformin eru í samræmi við yfirlýsingu formanna stjórnarflokkanna frá 19. apríl 2022. Skipulag stýringarinnar á eignarhlut ríkisins í fjármálafyrirtækjum verður þá með sama hætti og almennt tíðkast nú um eignarhald ríkisfyrirtækja, en kveðið er á um hlutverk fjármála- og efnahagsráðherra í þessum efnum í ákvæðum laga um opinber fjármál.

Í rökstuðningi segir að hið nýja fyrirkomulag sé í samræmi við það sem almennt tíðkast innan OECD. Talið er að með slíku fyrirkomulagi sé verulega dregið úr þeirri hættu sem felst í því að sami aðili sé í eigandafyrirsvari tiltekins félags auk þess að hann hafi með höndum faglegt eftirlit með starfsemi félags eða almennu starfsumhverfi þess.

Aðgreining ólíkra hlutverka ríkisins auðveldar þannig annars vegar óháða stefnumótun og reglusetningu starfsumhverfisins sem félagið starfar í og hins vegar sjálfstæða faglega stefnumótun um hlutverk ríkisins sem eiganda slíks félags. Slíkt fyrirkomulag veitir auk þess tækifæri til að innleiða samræmdar leiðbeiningar um upplýsingagjöf, skipan stjórna, arðsemiskröfur, eigandaeftirlit o.fl. Þrátt fyrir að lög um stofnunina verði felld niður er þó til skoðunar hvort breyta eigi lögum um opinber fjármál svo haldið verði í gildandi fyrirkomulag um að valnefnd tilnefni aðila fyrir hönd ríkisins í stjórnir fjármálafyrirtækja.

Smella hér til þess að skoða málið í samráðsgátt.

Deila þessari frétt á samfélagsmiðla

Deila