Kristján Örn Elíasson ræddi við Björgvin Víglundsson, byggingaverkfræðing og fyrrverandi landsliðsmann í skák, í þættinum Við skákborðið um þróun byggðarmála í Reykjavík og áhrif skipulags, byggingarreglna og húsnæðisstefnu á kostnað og gæði íbúðabyggðar. Í viðtalinu sagði Björgvin að núverandi þróun hefði leitt til dýrari framkvæmda og gert almenningi sífellt erfiðara fyrir að byggja eigið hús. Hlusta má á þáttinn í spilaranum hér að neðan.
Háhýsi og þétting byggðar
Björgvin sagði að við skipulag nýrra hverfa þyrfti að taka meira tillit til íslenskra aðstæðna. Hann benti á að háhýsi og þétt byggð gætu valdið mikilli skuggamyndun og auknum vindstrengjum þar sem sólin væri lág stóran hluta ársins. Að hans mati væri hætta á að slíkt drægi úr gæðum borgarumhverfisins og skapaði síður mannvæn hverfi.
Regluverk gerir byggingar dýrari
Björgvin taldi umfangsmikið regluverk hafa hækkað byggingarkostnað verulega. Hann sagði sífellt bætast við nýjar kröfur sem gerðu framkvæmdir flóknari og dýrari og hefðu í reynd útilokað marga frá því að byggja eigið hús. Sem dæmi nefndi hann að jafnvel lítil sumarhús þyrftu að uppfylla umfangsmiklar kröfur um hönnun og framkvæmdir.
Björgvin gagnrýndi einnig fyrirkomulag þar sem hluti kostnaðar vegna aðgengiskrafna félli á nýjar íbúðir og taldi eðlilegra að slíkur kostnaður væri borinn af samfélaginu í heild fremur en húsbyggjendum einum.
Flöt þök og eldri hugmyndir um skipulag
Björgvin sagði hallandi þök henta íslensku veðurfari betur en flöt þök sem gætu reynst kostnaðarsöm þegar viðhald eða rakaskemmdir kæmu upp eftir nokkur ár.
Hann nefndi jafnframt Smáíbúðahverfið sem dæmi um skipulag sem hefði staðist tímans tönn og taldi að einfaldara regluverk og mannvænni byggð gætu stuðlað að hagkvæmari og fjölbreyttari húsnæðisuppbyggingu.
Hlusta má á ítarlegri umfjöllun í spilaranum hér að neðan.