Deilur hafa blossað upp innan Evrópuþingsins, um nýja stefnu sem heimilar að flytja hælisleitendur sem hafa fengið synjun í sérstakar móttökumiðstöðvar utan Evrópusambandsins, á meðan beðið er brottvísunar. Fjallað er um málið á vef Euronews.
Ágreiningur um nýja leið í innflytjendamálum
Tillagan, sem samþykkt var 26. mars, felur í sér að aðildarríki geti komið á fót endurkomumiðstöðvum í þriðju ríkjum. Þar myndu einstaklingar dvelja eftir synjun umsókna, þar til þeir verða sendir til upprunalands. Stuðningsmenn telja að með þessu verði brugðist við veikleika í framkvæmd brottvísana, þar sem aðeins um 20% þeirra sem fá brottvísun eru í reynd sendir úr landi.
Segja úrræðið nauðsynlegt
Lena Düpont, þingmaður frá Þýskalandi fyrir Evrópska þjóðarflokkinn, segir slíkar miðstöðvar vanta í núverandi kerfi. Hún bendir á að Evrópusambandið hafi þegar byggt upp umfangsmikið hæliskerfi en skorti raunhæfa leið til að tryggja framkvæmd brottvísana. Juan Fernando López Aguilar, þingmaður frá Sósíalistum og demókrötum, hafnar hugmyndinni og segir hana fela í sér verulega áhættu. Hann segir að miðstöðvar utan sambandsins tryggi ekki vernd grundvallarréttinda og geti sett fólk utan gildissviðs laga ESB.
Pólitískur ágreiningur harðnar
Aguilar segir að breytingin endurspegli nýtt meirihlutasamstarf þar sem miðju-hægri flokkar styðjist við hægri sinnuð öfl til að knýja fram harðari stefnu í innflytjendamálum. Málið undirstrikar aukna spennu innan Evrópuþingsins um hvernig eigi að bregðast við innflytjendavandanum.