Áform Evrópusambandsins um að reisa svokallaðan „drónavegg“ við austurmörk sambandsins til að bregðast við meintum innrásum rússneskra dróna hafa sætt harðri gagnrýni af hálfu embættismanna ESB ríkja. Samkvæmt heimildum vefmiðilsins Bloomberg er verkefnið sagt ill framkvæmanlegt og einkum ætlað til sýndarmennsku, þar sem það mæti bæði tæknilegum, pólitískum og fjárhagslegum hindrunum.
Hugmyndin kynnt í flýti í örvæntingu
Á undanförnum vikum hafa borist fregnir um að drónar hafi farið inn fyrir lofthelgi Evrópusambandsins. Þótt flest aðildarríki hafi forðast að bera upp bein sakargögn á hendur Rússum hafa fjölmiðlar víða gert ráð fyrir að Moskva standi þar að baki, sem stjórnvöld í Kreml hafa hafnað. Þessi tilvik urðu til þess að embættismenn í Brussel flýttu sér í nokkurinni örvæntingu að kynna meðal annars svonefndan „drónavegg“ sem hefði það markmið að greina og stöðva ómannaðar flugvélar yfir landamærum sambandsins.
Hættulegt að koma upp loftvarnarkerfi í þéttri flugumferð
Embættismaður innan ESB, sem vildi ekki láta nafn síns getið í umfjöllun Bloomberg, sagði að hugmyndin væri að mestu leyti áróður til þess að dylja flókinn veruleika. Hann benti á að ein helsta hindrunin væri að koma á fót varnarlínu í lofthelgi sem þegar er þétt setin farþega- og fraktflugvélum, sem skapaði verulega hættu á slysum og tjóni.
Óvissa um stjórn og fjármögnun
Annað vandamál er að ákveða hver eigi að bera ábyrgð á samhæfingu verkefnisins. Heimildir Bloomberg benda einnig á að hugmyndin gæti dregið athygli frá stærra vandamáli, þ.e. því að Evrópusambandið er háð Bandaríkjunum þegar kemur að loftvörnum, á sama tíma og Donald Trump Bandaríkjaforseti hvetur bandalagsríki NATO til að axla aukna ábyrgð á eigin öryggismálum. Fjármögnunin er enn fremur umdeild. Þýskaland býst við hörðum deilum á væntanlegum leiðtogafundi ESB í Kaupmannahöfn um hvernig eigi að standa straum af slíkum framkvæmdum. Þrátt fyrir að Þjóðverjar hafi aukið hernaðarútgjöld sín leggjast þeir eindregið gegn sameiginlegri lántöku innan sambandsins.
Óánægja ríkja sem ekki njóta ávinningsins
Samkvæmt frétt Financial Times um málið eru sum vestræn og suðlæg aðildarríki óánægð með að fjármögnun slíks varnarkerfis myndi fyrst og fremst gagnast ríkjum á austurmörkum sambandsins. Í ljósi þess leita embættismenn ESB nú leiða til að gera áformin meira aðlaðandi fyrir þau ríki sem hafa efasemdir.