Pétur Gunnlaugsson ræddi við Jens Guð bloggara í Síðdegisútvarpinu í dag, um utanríkis- og varnarmál Færeyja og hvernig stefna eyjanna skarast við eða víkur frá stefnu Dana. Fram kom að þótt Danmörk fari formlega með utanríkis- og varnarmál hafa Færeyjar í reynd mótað sér sérstöðu, meðal annars gagnvart Rússlandi og í viðskiptum á Norður-Atlantshafi. Hlusta má á þáttinn í spilaranum hér að neðan.
Eiga viðskipti við Rússland óháð refsiaðgerðum ESB
Pétur benti á að Færeyjar væru ekki aðilar að Evrópusambandinu og taki því ekki sjálfkrafa þátt í refsiaðgerðum sambandsins gegn Rússlandi. Jens Guð benti á, að Rússland væri mikilvægur markaður fyrir færeyskan uppsjávarfisk og eldislax og að útflutningur hafi haldið áfram þrátt fyrir aukna spennu í Evrópu vegna stríðsins í Úkraínu. Sjávarútvegur stendur undir um 90% útflutningstekna Færeyja og því hefur markaðsaðgangur afgerandi þýðingu fyrir hagkerfið.
Staða á GIUK-línunni
Færeyjar liggja á svonefndri GIUK-varnarlínu milli Grænlands, Íslands og Bretlands sem hefur hernaðarlega þýðingu í Norður-Atlantshafi. Í umræðunni kom fram að til standi að efla ratsjár- og eftirlitsgetu á eyjunum. Þá hafi komið í ljós, eftir að bandarísk skjöl voru gerð opinber, að Danir hafi áður gert samninga um hernaðaraðstöðu í Færeyjum án þess að upplýsa heimastjórnina að fullu.
Færeyingar vilja taka aukinn þátt á alþjóðavettvangi
Jens sagði að vaxandi vilji væri, meðal Færeyinga, til að láta meira að sér kveða í alþjóðasamstarfi, þar á meðal innan Atlantshafsbandalagsins. Á sama tíma vilji margir halda ákveðinni fjarlægð frá stórveldapólitík og forðast að taka afdráttarlausa afstöðu í alþjóðadeilum. Þessi tvíþætta staða endurspegli sérstöðu eyjanna sem sjálfstjórnarsvæðis innan danska ríkisins.
Hlusta má á ítarlegri umfjöllun í spilaranum hér að neðan.