Árbæjarsafn býður upp á líflega og fjölbreytta dagskrá í desember. Fyrst verður haldin fullveldishátíð á safninu 1. desember og síðar jóladagskráin Bráðum koma blessuð jólin sunnudagana 7. og 14. desember. Safnið leggur áherslu á að tengja gesti við íslenskan menningararf og jólahefðir úr Reykjavík liðinna alda.
Fullveldishátíð með þjóðdönsum, kveðskap og handverki
Hátíð í tilefni fullveldis Íslands fer fram 1. desember milli klukkan 18 og 22. Að henni standa Árbæjarsafn ásamt félögum sem sinna þjóðdönsum, kvæðalist, harmonikuleik og handverki. Þar geta gestir kynnst gömlum dönsum, íslenskum krosssaumi, þjóðbúningum, harmonikum og kvæðalögum. Boðið verður upp á örnámskeið þar sem gestir læra grunnspor í þjóðdönsum og sauma lítið jólaskraut. Hægt verður að fá ráðgjöf um þjóðbúninga og eldri búningar og Dillonshús verður opið með veitingum.
Jólin eins og þau voru í Reykjavík til forna
Jóladagskráin Bráðum koma blessuð jólin verður í boði 7. og 14. desember. Þá gefst gestum kostur á að upplifa jólahefðir í þorpinu líkt og þær voru í upphafi 20. aldar. Í Árbæ verður sneitt laufabrauð og spunnið garn, í Hábæ verður boðið upp á hangikjöt og í Efstabæ kraumar kæst skata í potti. Í Nýlendu verða tálgaðar fígúrur og í Miðhúsum prentuð jólakort. Í Garðastræti verður steypt úr tólg og jólahald heldra fólks er sýnt í Suðurgötu 7. Í Krambúðinni verður jólaferðamönnum boðið að skoða jólavarning og í Dillonshúsi verður hægt að setjast niður og fá sér kaffi og bakkelsi.
Jólasveinar, helgihald og dans yfir hátíðarnar
Á báðum aðventudögunum mæta jólasveinar á svæðið, taka þátt í leikum, söng og dansi og gleðja gesti víða um safnið. Þá verður sungið og dansað í kringum jólatréð á torgi safnsins, auk þess sem haldin verður guðsþjónusta í safnkirkjunni. Boðið verður upp á sérhæfða leiðsögn; 7. desember á auðskilinni íslensku og 14. desember á táknmáli. Aðgangur er ókeypis fyrir börn, öryrkja og handhafa menningarkorts. Aðrir greiða 2.450 kr. Dagskrá lýkur klukkan 16 en safnið verður opið til klukkan 17.