Flokkur fólksins leggur til að vísa sölu Íslandsbanka frá

Inga Sæland, formaður Flokks fólksins, mun flytja nefndarálit á Alþingi í dag þar sem lagt er til að vísa frá frumvarpi um sölu á 42,5% hlut ríkisins í Íslandsbanka.

Í nefndarálitinu kemur meðal annars fram að ríkisstjórn Sjálfstæðisflokks, Framsóknarflokks og Vinstri grænna hafi í tvígang selt hlut ríkisins í Íslandsbanka undir markaðsverði og hafi lög brotin í síðara söluferlinu. Almenningur treysti því ekki ríkisstjórninni til að ráðstafa ríkiseignum eftir þessi hrakföll.

Þá segir að Íslandsbanki hafi skilað miklum hagnaði undanfarin ár og greitt arð til ríkisins. Ekki sé skynsamlegt að fórna reglulegum tekjum af arðgreiðslum fyrir skammtíma ágóða af sölu. Ávinningurinn af sölunni gæti horfið á innan við 20 árum miðað við væntar arðgreiðslur að því er segir í nefndarálitinu.

Einnig segir í nefndarálitinu að ríkisvæðing taps en einkavæðing hagnaðar sé ekki réttlætanleg. Ríkið hafi tekið á sig tap bankanna árið 2008 en nú eigi svo að selja arðbæra starfsemi Íslandsbanka til einkaaðila.

Flokkur fólksins telur óforsvaranlegt á þessum tíma að ráðast í sölu á Íslandsbanka með tilliti til þess að sitjandi ríkisstjórn nýtur ekki trausts til sölunnar og þjóðin vill ekki að eftirstandandi hlutur ríkisins verði seldur. Því leggur flokkurinn til að málinu verði vísað frá.

Deila þessari frétt á samfélagsmiðla

Deila