Franska kvikmyndahátíðin fer fram í Bíó Paradís dagana 23. janúar til 1. febrúar 2026. Á dagskrá eru nýjar franskar kvikmyndir, sérsýningar á sígildum verkum og viðburðir tengdir hátíðinni, þar á meðal heimsókn heiðursgests. Heiðursgestur hátíðarinnar í ár er franska stórstjarnan Isabelle Huppert. Í tengslum við hátíðina verður boðið upp á sérstaka kvöldstund með Huppert en nánari upplýsingar um þann viðburð verða kynntar síðar.
Opnunarmynd byggð á frægu hneykslismáli
Opnunarmynd hátíðarinnar er The Richest Woman in the World (La femme la plus riche du monde) sem verður einnig sýnd eftir að hátíðinni lýkur. Myndin er innblásin af hneykslismáli tengdu arftaka L’Oréal og fjallar um snyrtivörudrottninguna Marianne Farrère sem hleypir ljósmyndara inn í líf sitt með ófyrirséðum afleiðingum. Vinátta þeirra þróast í flókinn og hættulegan dans þar sem jafnvel valdamesta kona heims missir fótfestu.
Arkitektúr drama og bókmenntaarfur
Meðal annarra mynda á dagskrá er The Great Arch (L’inconnu de la Grande Arche) sem segir frá arkitekt sem tekst á við kerfið í baráttu sinni fyrir stórvirki rétt utan við París. Myndin sameinar persónulegt drama og samfélagslega gagnrýni og fer einnig í sýningar að hátíð lokinni.
The Stranger (L’étranger) flytur á hvíta tjaldið klassískt verk Alberts Camus. Myndin gerist í Alsír á fjórða áratugnum og fjallar um Meursault sem fremur glæp sem leiðir til réttarhalda þar sem samfélagið sjálft verður í brennidepli. Myndin vakti mikla athygli á kvikmyndahátíðinni í Feneyjum.
Nútímaleg átök og persónuleg sjálfsleit
The Little Sister (La petite dernière) fjallar um unga konu sem flytur frá úthverfum til Parísar í heimspekinám og glímir við togstreitu milli trúarlegs uppeldis og nýs frelsis. Myndin var frumsýnd í keppnisflokki Cannes 2025 og hlaut þar Queer Palm verðlaunin.
Í The Piano Accident (L’Accident de piano) er sjónum beint að samfélagsmiðlastjörnu sem verður fyrir slysi við myndbandagerð og dregur sig í hlé í fjalllendi þar sem ágangur fjölmiðla setur allt í uppnám. Myndin er nýtt verk úr smiðju Quentin Dupieux.
Sérsýningar og fjölbreytt dagskrá
Á hátíðinni verða einnig sérsýningar, þar á meðal föstudagspartísýningar á sígildum frönskum kvikmyndum. Þar má nefna La Haine sem verður sýnd föstudaginn 23. janúar og Amélie sem fer á tjaldið föstudaginn 30. janúar.
Fjölskyldum og yngri áhorfendum er einnig sérstaklega sinnt. Þar á meðal er sýning á Maya, donne-moi un titre þar sem sköpunargleði og ímyndunarafl eru í forgrunni og boðið verður upp á íslenskan texta og lifandi talsetningu síðar á hátíðinni.
Auk þess verða sýndar kvikmyndir valdar af menntaskólanemum, þar á meðal Souleymane’s Story sem fjallar um hælisleitanda í París sem stendur frammi fyrir úrslitaviðtali sem gæti ráðið framtíð hans.
Hátíðinni lýkur meðal annars með sérsýningu á Cléves þar sem höfundur verksins, Marie Darrieussecq, verður viðstödd og tekur þátt í umræðum að sýningu lokinni.
Nánari upplýsingar um dagskrá og sýningartíma má finna á vef Bíó Paradísar.