Arnþrúður Karlsdóttir og Pétur Gunnlaugsson ræddu við Vigdísi Hauksdóttur, lögfræðing og fyrrverandi þingmann og borgarfulltrúa í fréttum vikunnar í dag, og var ítarlega fjallað um áform Evrópusambandsins um að reisa svonefndan „drónavegg“ í Evrópu. Áformin eru sögð miða að því að verjast meintum rússneskum dróna ógnunum en í þættinum var bent á að slík ógn hafi hvorki verið rökstudd né studd með sönnunargögnum. Hlusta má á þáttinn í spilaranum hér að neðan.
Óásættanlegt að undirbúa aðgerðir án gagna og rökstuðnings
Í þættinum var bent á að engin gögn, hvorki myndir né skjöl, hafa verið birt sem staðfesta tilvist eða umfang drónaógnarinnar sem Evrópusambandið vísar til. Fram kom að þó að vísað hafi verið til þess að drónar hafi truflað flugumferð á Norðurlöndum hafi engin opinber gögn verið sýnd sem staðfesti þessar fullyrðingar. Það væri óásættanlegt í ljósi þess hve víðtækar og kostnaðarsamar aðgerðir sé verið að undirbúa.
Áformin um drónavegg notuð til að réttlæta aukin hernaðarútgjöld
Fram kom að áform um drónavegg væri hluti af víðtækri hernaðaruppbyggingu innan Evrópusambandsins og notað til að réttlæta síhækkandi útgjöld til varnarmála. Bent var á að þessi þróun fari fram á sama tíma og mörg Evrópuríki glími við versnandi efnahagsástand og skorið hafi verið niður í velferðarkerfum sem skaði hagsmuni almennings.
Í þættinum var einnig bent á að drónar séu mikið notaðir í friðsamlegum tilgangi svo sem við vöruflutninga, eftirlit og landbúnað og því sé óljóst hvernig eigi að skilgreina hvaða drónar teljist hættulegir og hverjir ekki. Þetta veki upp spurningar um hvers vegna eigi að setja upp varnir gegn óskilgreindri ógn sem lítið sem ekkert er vitað um.
Mette Frederiksen knýr á um harðari öryggisráðstafanir
Í þættinum var einnig vísað til orða Mette Frederiksen, forsætisráðherra Danmerkur sem hafi lýst yfir vilja til að efla varnir Evrópu og lagt áherslu á að bregðast þyrfti við drónaógninni með afgerandi hætti. Rætt var að yfirlýsingar hennar væru til marks um aukna hernaðarhyggju innan ESB og að leiðtogar eins og Frederiksen beittu sér fyrir því að hraða öryggis- og varnartengdum verkefnum þrátt fyrir skort á gögnum sem sýndu fram á raunverulega ógn.
Áhrif á Ísland vegna aukinnar varnarsamvinnu við Evrópu
Í þættinum kom fram að þessi þróun í öryggis- og varnarmálum Evrópusambandsins hefði bein áhrif á Ísland, þar sem landið taki í síauknum mæli þátt í samstarfi við ESB og NATO á Norðurslóðum. Kostnaður vegna slíkra verkefna og þátttaka Íslands í nýjum öryggisráðstöfunum gæti kallað á aukin útgjöld ríkisins á sama tíma og fjárþörf innanlands haldi áfram að aukast.
Hlusta má á ítarlegri umfjöllun í spilaranum hér að neðan.