Pétur Gunnlaugsson ræddi við Jón Pétur Zimsen, þingmann Sjálfstæðisflokksins og fyrrverandi skólastjóra í síðdegisútvarpinu um stöðu íslenska skólakerfisins og þær breytingar sem hann telur nauðsynlegar til að bæta námsárangur og starfsaðstæður í grunnskólum landsins. Jón Pétur sagði íslenska skólakerfið hafa þróast í ranga átt frá aldamótum og þeir sem hefðu mótað kerfið vildu ekki viðurkenna mistökin í dag. Það væri orðið óumflýjanlegt að endurskoða bæði kennsluhætti og skipulag skólanna aftur og hann væri sammála aðgerðaáætlun Ingu Sæland barna og menntamálaráðherra í þeim efnum. Hlusta má á þáttinn í spilaranum hér að neðan.
Misheppnuð hugmyndafræði látin ráða ferðinni
Í viðtalinu kom fram gagnrýni á stefnu um skóla án aðgreiningar sem tekin var upp hér á landi fyrir rúmum 2 áratugum. Jón Pétur sagði markmiðin hafa verið falleg í orði en framkvæmdin misheppnast þar sem sérdeildir hefðu verið lagðar niður án þess að nægur stuðningur fylgdi með inn í almenna bekki. Að hans mati hefði þetta skapað mjög erfiðar aðstæður fyrir bæði nemendur og kennara. Nemendur með sérþarfir fengju ekki þann stuðning sem þeir þyrftu á að halda og á sama tíma hefði álag aukist verulega á kennara sem þyrftu að sinna sífellt fjölbreyttari nemendahópum inni í sömu skólastofunni.
Jón Pétur gagnrýndi einnig þær kennslufræðilegu hugmyndir sem hefðu verið ráðandi í menntakerfinu um langt skeið. Þar nefndi hann áherslu á sjálfstýrt nám, minni aga í skólastofum og þá sýn að nemendur ættu sjálfir að bera meiri ábyrgð á eigin námi. Hann sagði slíkar hugmyndir ekki samræmast raunverulegum aðstæðum í grunnskólum.
Vill meiri aga og skýrari kennslu – þeir sem mótuðu kerfið vilja ekki viðurkenna mistökin
Að mati Jóns Péturs þarf að færa kennaranum aftur sterkari stöðu inni í skólastofunni og byggja meira á skýrri kennslu, markvissri þjálfun og mælanlegum námsmarkmiðum. Hann sagði að íslenskt skólakerfi hefði um of horfið frá hefðbundnum kennsluaðferðum sem sýnt hefðu árangur. Í umræðunni kom einnig fram að hann teldi kennarakerfið og háskólasamfélagið hafa varið þessa stefnu árum saman, þrátt fyrir versnandi námsárangur. Jón Pétur sagði að þeir sem hefðu mótað kerfið ættu erfitt með að viðurkenna að þróunin hefði mistekist.
Hann sagði jafnframt að umræðan um menntamál hefði verið of lítil í stjórnmálum þrátt fyrir að grunnskólar væru stærsti útgjaldaliður flestra sveitarfélaga. Bent var á að í löngum umræðuþáttum fyrir sveitarstjórnarkosningar hefði grunnskólinn varla komið til umræðu.
Styður breytingar Ingu Sæland
Jón Pétur taldi þó að hægt væri að bæta stöðu skólakerfisins á tiltölulega skömmum tíma ef vilji væri fyrir hendi. Hann sagði Ísland vera lítið samfélag sem gæti brugðist hraðar við en stærri ríki, ef stjórnvöld tækju skýra stefnu um breytingar. Í viðtalinu lýsti hann einnig stuðningi við þær breytingar sem Inga Sæland barna og menntamálaráðherra hefði rætt um í málaflokknum og sagði mikilvægt að fleiri stjórnmálaflokkar væru tilbúnir að takast á við vandann með opnum hætti.
Að mati Jóns Péturs er staða menntakerfisins orðin það alvarleg að ekki sé lengur hægt að fresta umfangsmiklum breytingum á skipulagi og áherslum í grunnskólum landsins.
Hlusta má á ítarlegri umfjöllun í spilaranum hér að neðan.