Þau sérkennilegu afskipti sem Þórdís Kolbrún Reykfjörð Gylfadóttir utanríkisráðherra hefur haft af innanríkismálum í Georgíu, meðal annars með ræðuhöldum þar á mótmælum gegn lögum sem taka á afskiptum alþjóðlegra afla í landinu, er hluti af því að koma á einni heimsstjórn. Þetta var meðal þess sem fram kom í Heimsmálunum í dag en þar var Haukur Hauksson fréttamaður í Moskvu viðmælandi Arnþrúðar Karlsdóttur og Péturs Gunnlaugssonar.
Haukur segir framgöngu Þórdísar vera alvarleg og gróf afskipti af innanríkismálum því lögin sem voru samþykkt fyrir skömmu er ætlað að taka á alþjóðaöflum sem vilja seilast til valda í landinu. Haukur segir að meðal annars sé verið að spyrna gegn áhrifum stofnana og samtaka eins og þeim samtökum og sjóðum sem George Soros stendur fyrir, auk no Borders og fleiri slíkra samtaka af svipuðum toga.
Alrangt að Georgia hafi samþykkt rússnesk fjölmiðlalög
Þá segir Haukur að í umfjöllun meginstraumsfjölmiðla á Íslandi eins og RÚV og Morgunblaðinu sé látið að því liggja að um rússnesk lög séu að ræða sem sé algjör vitleysa. Til að mynda hafi svipuð lög verið sett í Bandaríkjunum árið 1938 og það hafi ekki verið fyrr en fyrir fimm árum síðan að svipuð lög hafi verið tekin upp í Rússlandi. Þau lög séu einmitt til þess að sporna við áhrifum erlendra afla í landinu og eru í raun sett til þess að verja landið. Þá sé einnig vel þekkt hvernig hin erlendu öfl nýta sér fjölmiðla til þess að ná fram markmiðum sínum og á því sé einnig tekið í þeim lögum sem hafa nú verið samþykkt í Georgíu.
Ísland með lög sem fara framhjá EES samningnum
Arnþrúður benti á að hér á landi séu þær gagnsæiskröfur gerðar sem varða fjölmiðla að eignarhald á þeim sé uppi á borðum. Hins vegar sé ekki farið eftir megin atriði EES samningsins þar sem ætlast sé til þess að Ísland uppfylli öll samkeppnisskilyrði innan Evrópusambandsins og var það einmitt meginforsenda þess að Ísland fékk að skrifa undir EES samninginn. Þess vegna hefur Ríkisútvarpið verið rekið á undanþágu frá EES. Þá sé ákveðinn samingur í gildi um mötun frétta frá ákveðnum miðlum eins og Reuters og AP og því séu það í raun þær fréttastofur sem stýri þeim erlendu fréttum sem sagðar eru hér á Íslandi.
Hlusta má á þáttinn í spilaranum hér að neðan