Hjáveitulögnin í sundur og ekkert heitt vatn á Reykjanesi næstu daga

Hjáveitulögnin sem vonast var til að hægt væri að nota í stað þeirrar sem eyðilagðist í eldgosinu á fimmtudag er skemmd og flytur því ekkert heitt vatn. Í tilkynningu frá HS-Veitum er greint frá þessu.

Í tilkynningunni segir að þegar vatni var hleypt á lögnina hafi hún brostið. Staðsetningin skemmdarinnar er undir miðju hrauni, á þeim kafla þar sem það er þykkast, og því útilokað að ráðast í viðgerðir þar.

Þegar er hafinn undirbúningur að lagningu nýrrar lagnar í nánu samstarfi við almannavarnir en ljóst er að sú framkvæmd mun taka einhverja daga. Ekki er hægt að áætla nákvæmari tímasetningar á þessari stundu.

Þá benda HS-Veitur á að Brýnt sé er að fylgja leiðbeiningum almannavarna og HS Veitna varðandi viðbrögð í þessum erfiðu og krefjandi aðstæðum sem sjá má með því að smella hér.

Þá hafa Almannavarnir einnig sent frá sér tilkynningu vegna málsins en í henni segir:

Afleiðingar af eldgosinu sem hófst um sexleytið á fimmtudagsmorgun er að sýna sig að verða verulegar og mun hafa mjög mikil áhrif á daglegt líf íbúa á Reykjanesi næstu dagana. Því er óhætt að segja að næsta vika mun taka á samtakamátt og samheldni íbúa.

Það er ljóst að næstu dagar og nætur geta því orðið kaldar í húsum á Suðurnesjum. Mörg eru búin að tryggja sér rafmagnshitara og er það ítrekað að minna fólk á að nota þau raftæki sparlega, eða eftir þörfum og taki þar með tillit til annarra.

Í kvöld kom það vel í ljós hvaða áhrif álagspunktar á kerfið geta haft þegar rafmagn fór af stórum hluta svæðisins. Áður hefur komið fram að rafdreifikerfi HS Veitna er ekki hannað til húskyndingar  og því þolir kerfið ekki mikla álagspunkta. Það er ekki hægt að segja það nægilega oft hve mikilvægt það er fyrir rafkerfið á Suðurnesjum að fara sparlega með rafmagnið. Það mun skipta sköpum fyrir næstu daga.

Áfram vilja Almannavarnir hvetja alla til þess að huga að nágrönnum sínum, það er ekki víst að allir hafi haft tækifæri til að verða sér úti um hitara eða skilji þær leiðbeiningar sem sendar hafa verið út í dag um takmörkun á notkun þeirra.  

  • Einhver orðið sér út um gashitara og minnum við á mikilvægi þess að hafa opna glugga þegar gas er notað. Þá er ekki síður mikilvægt að slökkva á öllu gasi áður en fólk fer að sofa og setja gaskútinn út fyrir dyr. Aldrei á að nota gas í lokuðu rými innanhúss og yfir nótt, mikilvægt er að lofta um rými þar sem gas er í notkun.
  • Til að halda rafmagni á húsum er mikilvægt að allir hámarki rafkyndingu við 2,5 kW á hverja íbúð, fari sparlega með rafmagn, slökkva á rafmagnsofnum á meðan önnur orkufrek raftæki eru notuð og hlaði ekki rafbíla heima fyrir heldur noti hverfahleðslur og hraðhleðslur sem í boði eru á svæðinu.
Deila þessari frétt á samfélagsmiðla

Deila