Inga Sæland hefur ákveðið að færa sig um set og taka við embætti mennta- og barnamálaráðherra en Ragnar Þór Ingólfsson tekur við af henni sem félags- og húsnæðismálaráðherra. Ráðherraskiptin verða í kjölfar þess að Guðmundur Ingi Kristinsson sagði af sér embætti mennta- og barnamálaráðherra af heilsufarsástæðum.
Guðmundur Ingi gekkst undir stóra opna hjartaaðgerð seint í desember og þarf nú tíma til að jafna sig og ná fullum kröftum. Inga óskar honum alls hins besta og segir hún hlakka til að fá hann aftur til þingstarfa þegar þar að kemur. Hún rifjar jafnframt upp að þau hafi fylgst að allt frá stofnun Flokks fólksins og um tíma verið einu þingmenn flokksins í stjórnarandstöðu.
Áhersla á börn og menntamál
Inga segir Flokk fólksins hafa verið meðal annars stofnaðan með það að markmiði að bæta kjör barna sem búa við fátækt. Hún bendir á að fjölmargar áskoranir bíði úrlausnar í mennta- og barnamálaráðuneytinu, meðal annars í grunnskólamálum og varðandi börn með fjölþættan vanda. Þessi mál séu meðal helstu áherslumála ríkisstjórnarinnar.
Ráðherraskipti í félags- og húsnæðismálum
Í tilkynningunni kemur fram að miklu hafi verið áorkað í félags- og húsnæðismálaráðuneytinu á fyrsta ári ríkisstjórnarinnar og að fleiri verkefni séu þar í farvatninu. Inga kveður ráðuneytið með trega en Ragnar Þór Ingólfsson tekur við og mun tryggja áframhaldandi framgang þeirra mála sem þar eru í undirbúningi. Hann hefur meðal annars farið fyrir húsnæðishópi ríkisstjórnarinnar og býr yfir víðtækri reynslu á sviði húsnæðis-, vinnumarkaðs- og félagsmála.