Arnþrúður Karlsdóttir ræddi við Fjölni Sæmundsson, rannsóknarlögreglumann og formann Landssambands lögreglumanna í síðdegisútvarpinu í dag um umfangsmikið fíkniefnamál sem kom upp í Straumsvíkurhöfn. Tilefni umræðunnar var haldlagning um 106 kílóa af kókaíni sem barst hingað til lands með flutningaskipi frá Brasilíu. Fjölnir sagði málið sýna að alþjóðleg skipulögð glæpastarfsemi leiti stöðugt nýrra leiða til að flytja fíkniefni milli landa og árangur rannsóknarinnar byggist á víðtæku samstarfi yfir landamæri. Lögreglan hefur handtekið alls 9 manns sem hafa verið úrskurðaðir í gæsluvarðhald, þar af eru 6 manns af erlendum uppruna og 3 Íslendingar sem eru þekktir í fíkniefnaheiminum. Hlusta má á þáttinn í spilaranum hér að neðan.
Alþjóðlegt lögreglusamstarf skilaði árangri
Aðspurður um rannsókn málsins sagði Fjölnir að lögregla hefði ekki rekist á sendinguna fyrir tilviljun. Rannsóknin hefði verið unnin í samstarfi íslenskra og erlendra lögregluyfirvalda og tengdist meðal annars samstarfi í gegnum Europol. Þar sem fíkniefnin væru talin hafa komið frá Brasilíu hefði rannsóknin eðli máls samkvæmt einnig kallað á samskipti við yfirvöld í fleiri ríkjum.
Smyglað um iðnaðarhöfn í stað hefðbundinna leiða
Í viðtalinu ræddi Arnþrúður um þá staðreynd að um væri að ræða Straumsvíkurhöfn en ekki hefðbundna vöruflutningahöfn. Fjölnir sagði það sýna hvernig skipulögð glæpasamtök leituðu stöðugt nýrra leiða til að komast hjá eftirliti. Að hans sögn væru iðnaðarhafnir, líkt og aðrir staðir þar sem stór skip kæmu að landi, orðnar hluti af þeirri áhættu sem lögregla þyrfti að horfa til.
Kafarar hafa komið efninu fyrir á borni skipsins
Hann sagði einnig að samkvæmt þeim upplýsingum sem væru fyrirliggjandi, hefðu fíkniefnin verið falin í sjókistu skipsins. Slíkar smyglleiðir væru þekktar erlendis en hefðu lítið komið við sögu hér á landi. Til þess að smylga með þeim hætti þyrfti sérþekkingu kafara, bæði við að koma efnunum fyrir og síðar við að ná þeim úr skipinu.
Innlendir tengiliðir tengjast málinu
Aðspurður um hvernig staðið væri að slíku smygli sagði Fjölnir að slíkt væri vart mögulegt nema með aðstoð innlendra aðila. Erlendir skipuleggjendur þyrftu tengiliði á Íslandi til að taka við sendingum, sjá um dreifingu eða sinna öðrum þáttum starfseminnar.
Peningaþvætti á bak við smyglið
Rætt var um að andvirði þessarar sendingar af kókaíni væri talið nema nokkrum milljörðum þegar á götuna væri komið, fyrir utan þann skaða sem yrði á mannslífum sem yrðu hjá notendum efnanna. Spurði Arnþrúður hvort slíkt umfang af peningum færi í peningaþvottavélar hér á landi, eins og gervifyrirtæki, félagasamtök og aðra slíka.
Fjölnir benti á að rannsóknir beindust ekki eingöngu að innflutningi fíkniefna heldur einnig að því hvernig ágóði þeirra væri þveginn inn í lögmætt hagkerfi. Þar kæmu meðal annars til skoðunar fölsk reikningsviðskipti, félagasamtök og fyrirtæki sem væru notuð til að fela uppruna ólögmætra fjármuna.
Fjölnir sagði að þótt haldlagningin væri ein sú stærsta sem komið hefði upp hér á landi bæri að líta á málið sem hluta af stærra alþjóðlegu neti skipulagðrar glæpastarfsemi. Því væri öflugt samstarf íslenskra og erlendra lögregluyfirvalda ein mikilvægasta forsenda þess að unnt væri að sporna við síbreytilegum smyglleiðum og starfsháttum glæpasamtaka.
Hlusta má á ítarlegri umfjöllun í spilaranum hér að neðan.