Þegar meint loftslagsógn er annars vegar er það helst koltvísýringurinn sem sagður er skaðlegur fyrir loftslagið. Af þeim völdum er allt sem myndar koltvísýring sem þyrnir í augum þeirra sem hafa trú á því að koltvísýringurinn sé skaðlegur. Í þættinum Heimsmálin, fréttir og fréttatengt efni af erlendum vettvangi fjallaði Gústaf Skúlason fréttamaður í Stokkhólmi sem var í viðtali hjá Pétri Gunnlaugssyni meðal annars um viðtal sænsku sjónvarpsstöðvarinnar Swebbtv við verkfræðinginn Sture Åström sem heldur úti vefsíðu um loftslagsvitund. Í viðtalinu tekur Sture kenningar um loftlagshlýnun af mannavöldum og tætir þær í sig.
Hann segir tal um skaðlegan koltvísýring sem veldur svo ákveðnum hópi svokölluðum loftslagskvíða aðeins sýna fram á hvernig fjölmiðlar geti stjórnað umræðunni um loftslagsmál en ekki að hann sé skaðlegur fyrir loftslagið í raun. Þvert á móti geri koltvísýringur umhverfinu mikið gagn.
„Öll blekkingin um áhrif koltvísýrings á loftslagið byggir á þeirri sannfæringu að hægt sé að spá fyrir hvernig loftslagið verði með loftslagslíkönum, þ.e. tölvugerðum líkönum af þróun loftslags. Það er svo heimskulegt að orð fá ekki lýst því. Það er tekið fram að loftslagið sé glundroði og slíkt er ekki hægt að reikna út. Þess vegna er ekki hægt að reikna út hvernig loftslagið hefði í raun litið út í dag, ef við hefðum ekki brennt koltvísýringi. Það er ekki hægt að reikna það út, því það eru svo margir áhrifaþættir og flestir þeirra vitum við ekki nægjanlega um.“
„Af 80 þáttum þekkjum við mögulega 10, 20, eða 30 en þá eru samt eftir 50 sem við verðum að reikna með. Það þýðir ágiskanir. Þannig að við höfum helling af tilgátum. Þetta eru nánast allt getgátur. Þú kveikir á tölvunni og treystir á hana. Síðan tekur þú niðurstöðuna og segist rannsaka hana. En þú setur þetta allt saman sjálfur. Það er ljóst, að niðurstaðan verður eins og hún er forrituð til að vera. Þú getur ekki rannsakað það. Það er Orwellskt nýyrði að kalla þetta rannsóknir.“
Það er þekkt að garðyrkjubændur noti einmitt koltvísýring til þess að örva vöxt plantna í gróðurhúsum sínum og því hljóta að vakna upp spurningar um hvernig það megi vera að áhersla sé lögð á að fólk dragi úr neyslu kjöts og auki grænmetisneyslu. Það að grænmetisbændur noti koltvísýring til þess að auka vöxt plantna hlýtur líka að vekja upp þá spurningu um að ef svo mikið magn af koltvísýringi væri í andrúmsloftinu og haldið sé fram, hversv vegna bændur þurfi þá að gefa plöntum sínum aukaskammt af honum.
Hlusta má á þáttinn í spilaranum hér að neðan