Útvarpsstjórinn Arnþrúður Karlsdóttir og Pétur Gunnlaugsson frá Útvarpi Sögu voru á leiðtogafundi heimselítunnar í Hörpu í vikunni. Arnþrúður greindi frá því í símatíma hlustenda, að blaðamannafélagið sem hún er meðlimur í, sagði hana komna á eftirlaun og ætti hún því ekkert erindi á fundinn og neitaði henni um blaðamannapassa sem krafist var við inngöngu blaðamanna. Aldur á samt ekki að skipta neinu máli, þegar um virkan fjölmiðil er að ræða sem Útvarp Saga er svo sannarlega og til fyrirmyndar fyrir aðra í fjölmiðlabransanum. Arnþrúði tókst að næla sér í blaðamannamiða hjá evrópskum aðstandendum fundarins sem vildu ekkert annað en að allir fjölmiðlar hefðu greiðan aðgang til að segja fréttir af fundinum og að neðan má sjá nokkrar af þeim mörgu myndum sem Útvarp Saga tók við þetta tækifæri. Einnig var fjallað um fundinn í Fréttum vikunnar á Útvarpi Sögu. Blaðamannafundur var haldinn í lok fundarins í Hörpu þar sem Katrín Jakobsdóttir forsætisráðherra og Þórdís Reykfjörð, utanríkisráðherra kynntu helstu niðurstöður leiðtogafundarins ásamt þeim Denys Shmyhal forsætisráðherra Úkraínu, Edgars Rinkēvičs, utanríkisráðherra Lettlands og Mariju Pejčinović Burić, framkvæmdastjóra Evrópuráðsins (sjá mynd að ofan).
Reykjavíkuryfirlýsingin
Leiðtogar aðildarríkja Evrópuráðsins samþykktu Reykjavíkuryfirlýsinguna á fundi sínum í Reykjavík 17. maí og settu á stofn alþjóðlega tjónaskrá fyrir Úkraínu vegna þess tjóns sem innrás Rússlands hefur valdið Úkraínu. Katrín Jakobsdóttir forsætisráðherra undirritaði yfirlýsingu um tjónaskrána fyrir Íslands hönd í kjölfarið. Alls skrifuðu 45 aðildarríki og áheyrnaraðilar undir skjalið.
Það sem stóð þó uppúr á fundinum hvað Ísland varðar, voru meintar undanþágur Íslands undan kolefnisgjöldum vegna flugs, sem Katrín Jakobsdóttir kynnti með eftirminnilegum hætti eftir fund hennar með Ursulu Von Der Leyen. Gleðin var þó stutt, því þegar betur var að gáð, er aðeins um greiðslufrest í um tvö ár að ræða og til þess að bæta gráu ofan á svart þá er samt sem áður full greiðsluskylda í gildi. Þá hefur það vakið athygli hversu litla eftirtekt þessi „heimsleiðtogafundur“ hefur vakið í pressunni erlendis. Sænska sjónvarpið sagði t.d. ekki frá ráðstefnunni í fréttum sínum svo tekið væri eftir en minntist í 4 línum í framhjáhlaupi á fundinn á heimasíðu sinni.
Myndir frá ráðstefnunni
Hér að neðan er myndasyrpa frá leiðtogafundinum. (Einnig fljóta með nokkrar myndir úr beinni útsendingu frá ráðstefnunni sem er aðgengileg á síðu stjórnarráðs).
