Fulltrúar frá innkaupastofnun Atlantshafsbandalagsins heimsóttu Ísland á dögunum til að kynna íslenskum fyrirtækjum viðskiptatækifæri innan bandalagsins og vekja áhuga sérfræðinga á störfum hjá stofnuninni. Heimsóknin var skipulögð af utanríkisráðuneytinu og Landhelgisgæslu Íslands í samstarfi við Íslandsstofu og Samtök iðnaðarins.
Fundað í Utanríkisráðuneytinu og tæknifyrirtæki heimsótt
Á fundi í utanríkisráðuneytinu kynntu fulltrúar stofnunarinnar hvernig íslensk fyrirtæki geta tekið þátt í útboðum og verkefnum á vegum Atlantshafsbandalagsins og aðildarríkja þess. Einnig voru heimsótt fyrirtæki sem starfa á sviði tæknilausna með svokallað tvíþætt notagildi, það er tækni sem nýtist bæði í borgaralegum tilgangi og á sviði öryggis- og varnarmála.
Þorgerður Katrín Gunnarsdóttir utanríkisráðherra segir stjórnvöld hafa lagt áherslu á að auka vitund um þau tækifæri sem felast í samstarfi við Atlantshafsbandalagið. Að hennar sögn skiptir máli að nýta þekkingu og sköpunarkraft íslenskra fyrirtækja til að efla öryggi bæði hér á landi og hjá bandalagsríkjum.
Störf kynnt fyrir sérfræðingum
Samhliða kynningunni fyrir atvinnulífið var haldinn fundur í Hörpu þar sem starfsemi innkaupastofnunarinnar og ráðningarmöguleikar voru kynntir fyrir íslenskum sérfræðingum. Á fundinum var meðal annars farið yfir starfsumhverfi stofnunarinnar, umsóknarferli og áform um fjölgun starfsmanna á næstu misserum.
Sinnir innkaupum fyrir NATO
Innkaupastofnun Atlantshafsbandalagsins sér um innkaup og stoðþjónustu fyrir stofnanir NATO og aðildarríki þess. Starfsemin nær meðal annars til flutninga, birgðastjórnunar, viðhalds búnaðar, flug- og sjóflutninga, eldsneytisreksturs og stuðnings við alþjóðleg verkefni og æfingar.
Höfuðstöðvar stofnunarinnar eru í Lúxemborg en hún starfar víða um aðildarríki Atlantshafsbandalagsins.