Arnþrúður Karlsdóttir ræddi við Ólaf Kr. Guðmundsson umferðaröryggissérfræðing í síðdegisútvarpinu um stöðu gatnamannvirkja á höfuðborgarsvæðinu. Hann benti á að Reykjavíkurborg hefði ekki byggt ein einastu mislæg gatnamót frá árinu 2007, þrátt fyrir að umferðin hefði aukist verulega á sama tíma. Hlusta má á þáttinn í spilaranum hér að neðan.
Treyst á ljós og hringtorg
Ólafur sagði að borgaryfirvöld hefðu á síðustu árum frekar kosið að byggja ljósastýrð gatnamót og hringtorg í stað mislagðra gatnamóta. Hann gagnrýndi þessa stefnu harðlega og sagði hana draga úr afkastagetu helstu stofnæða. Á sama tíma hefðu nágrannalöndin lengi byggt mislæg gatnamót á öllum stærri stofnbrautum.
Umferðarteppur og minni afkastageta
Að sögn Ólafs væri skýrt að hringtorg og ljós gætu ekki annað því umferðarálagi sem nú væri á helstu leiðum höfuðborgarsvæðisins. Hann nefndi sérstaklega Miklubraut, Kringlumýrarbraut og Reykjanesbraut í því sambandi, þar sem reglulegar tafir og árekstrar væru afleiðingar þess að ekki hefðu verið byggð mislæg gatnamót.
Stefna sem kostar samfélagið mikið – Má rekja til þéttingu byggðar
Ólafur sagði að þessi stefna hefði skapað viðvarandi flöskuhálsa sem hefðu bæði efnahagslegar og öryggislegar afleiðingar. Tafir í umferðinni kostuðu samfélagið milljarða á ári, auk þess sem slysahætta ykist við gatnamót sem ekki væru hönnuð til að ráða við álagið. Þessi tregða að leysa umferðarvandann hjá Reykjavíkurborg megi rekja til þéttingar byggðar sem hefði aukið álagið í umferðinni á röngum stöðum.
Þörf á grundvallarbreytingu
Í viðtalinu kom fram að sérfræðingar hefðu árum saman lagt til að mislæg gatnamót yrðu byggð á helstu stofnæðum, en pólitískan vilja hefði skort. Ólafur sagði að nú væri komið að því að endurmeta þessa stefnu og hefja uppbyggingu að nýju, því ekki væri annað raunhæft til að mæta þeirri umferð sem höfuðborgarsvæðið stendur frammi fyrir í dag.
Hlusta má á ítarlegri umfjöllun í spilaranum hér að neðan.