Pétur Gunnlaugsson ræddi við Pétur Marteinsson oddvita Samfylkingarinnar í Reykjavík, í Síðdegisútvarpinu um hvað aðgreini stefnu Samfylkingarinnar frá öðrum flokkum í borginni og hugmyndir um svokallaðar 15 til 20 mínútna borgir. Þar kom fram að hugmyndafræðileg nálgun jafnaðarmennsku og skipulag hverfa, með þjónustu í göngufæri, væru meðal þeirra þátta sem skildu stefnu flokksins frá öðrum framboðum í aðdraganda borgarstjórnarkosninganna 16. maí næstkomandi. Hlusta má á þáttinn í spilaranum hér að neðan.
Jafnaðarsjónarmið í borgarskipulagi
Pétur lagði áherslu á að stefna flokksins byggðist á því að jafna aðgengi að leikskólum, skólum og tómstundastarfi, óháð efnahag eða félagslegri stöðu foreldra. Að hans mati væru merki um aukinn ójöfnuð í samfélaginu sem kallaði á markvissari stefnu í skipulagsmálum borgarinnar.
Þjónusta innan 15 til 20 mínútna göngufjarlægðar
Hann lýsti því að Samfylkingin vilji þróa Reykjavík í átt að mannlífsborg þar sem íbúar geti sótt helstu þjónustu innan 15 til 20 mínútna göngufjarlægðar frá heimili sínu. Þar væri meðal annars átt við leikskóla, skóla og íþróttastarf. Þá sagði Pétur að markmiðið væri að skapa sterk hverfi þar sem dagleg þjónusta væri aðgengileg án þess að ferðast þyrfti langar vegalengdir með einkabíl.
Hlusta má á ítarlegri umfjöllun í spilaranum hér að neðan.