Arnþrúður Karlsdóttir ræddi við Úlfar Lúðvíksson fyrrverandi lögreglustjóra á Suðurnesjum í síðdegisútvarpinu í dag um aðdraganda starfsloka hans og þá pólitísku þætti sem hann telur hafa legið að baki ákvörðun dómsmálaráðherra. Hlusta má á þáttinn í spilaranum hér að neðan.
Reynslumikill embættismaður
Úlfar hefur gegnt fjölbreyttum stjórnunarstörfum innan löggæslu og réttarkerfis í rúma þrjá áratugi. Hann starfaði meðal annars hjá dómstólum, sýslumannsembættum og síðar sem lögreglustjóri á Vesturlandi og Suðurnesjum. Í síðasta embætti bar hann ábyrgð á umfangsmiklum öryggismálum og landamærum tengdum Keflavíkurflugvelli og eldgosum á Suðnesjum. Hann segir að engar athugasemdir hafi verið gerðar við störf hans á þessum tíma og að embættið hafi verið rekið innan fjárheimilda.
Óvænt boðun sem breytti stöðunni
Að sögn Úlfars var honum boðað á fund með dómsmálaráðherra 12. maí án þess að efni fundarins væri kynnt fyrirfram. Þar hafi ráðherra upplýst að hún hygðist gera breytingar vegna fyrirhugaðrar brottvísunarmiðstöðvar og að hún teldi tímabært að skipa nýjan lögreglustjóra á Suðurnesjum. Úlfar segir framsetningu ráðherra hafa borið með sér skýrt vantraust á störf hans.
Tilboð um flutning í annað embætti
Á fundinum var honum tjáð að hann gæti sótt um stöðu lögreglustjóra á Austurlandi með flutningi. Hann hafnaði því og taldi að slíkt tilboð samræmdist hvorki faglegri málsmeðferð né réttum vinnubrögðum í opinberri stjórnsýslu. Í kjölfarið var gerður starfslokasamningur.
Áherslur sem leiddu til ágreinings
Úlfar sagðist telja ákvörðun ráðherra byggða á mismunandi sýn á framkvæmd landamæraeftirlits og útlendingamála en ekki á faglegu mati á starfshæfni hans. Hann hafi ítrekað bent á kerfisgalla sem honum þótti brýnt að bregðast við en upplifði að sjónarmið hans hefðu ekki notið stuðnings innan ráðuneytisins. Hann sagði það vera ástæðu þess að brottförin gæti ekki talist faglega rökstudd. Þá benti Úlfar á að hann hafi átt í stirðum samskiptum við Hauk Guðmundsson þáverandi ráðuneytisstjóra í Dómsmálaráðuneytinu, þau samskipti hafi þó aldrei rist mjög djúpt að hans mati.
Hluti af stærra mynstri innan kerfisins
Aðspurður sagði Úlfar brottför sína falla að mynstri þar sem fleiri háttsettir embættismenn,allt karlmenn hafa verið látnir víkja úr störfum við sambærilegar aðstæður á undanförnum árum. Hann sagði að opinber ummæli ráðherra hefðu styrkt þá sýn að pólitísk sjónarmið hefðu haft áhrif á ákvörðunina. Að hans mati væri eðlilegt að óháður aðili meti hvort rétt hafi verið staðið að málinu eins og Umboðsmaður Alþingis.
Hlusta má á ítarlegri umfjöllun í spilaranum hér að neðan.