Arnþrúður Karlsdóttir ræddi við Guðmund Ásgeirsson formann Hagsmunasamtaka heimilanna og lögfræðing um frumvarp sem ríkisstjórnin hyggst leggja fyrir Alþingi um rafræna málsmeðferð. Það felur í sér að rafræn birting skjala í pósthólfi á Ísland.is verði talin fullnægja skilyrði um „tilkynningu með sannarlegum hætti“. Guðmundur varaði við því að slík breyting gæti haft alvarlegar afleiðingar fyrir einstaklinga sem ekki hafa tök á að fylgjast reglulega með stafrænum samskiptum við stjórnvöld. Hlusta má á þáttinn í spilaranum hér að neðan.
Mótmæltu frumvarpinu í samráðsgátt stjórnvalda
Guðmundur sagði að áform um breytingarnar hefðu fyrst birst í samráðsgátt stjórnvalda síðastliðið sumar. Þar var gert ráð fyrir að innleiða rafræna málsmeðferð í ýmsum málaflokkum, meðal annars í erfðamálum, gjaldþrotaskiptum, aðfara- og nauðungarsölumálum. Hagsmunasamtök heimilanna sendu umsögn í lok júlí og bentu á að rafræn birting án móttökustaðfestingar gæti haft alvarlegar afleiðingar fyrir borgarana.
Gagnrýna að staðfest móttaka verði ekki lengur skilyrði
Samkvæmt núgildandi reglum þarf að birta skjöl sem geta haft réttaráhrif annaðhvort með ábyrgðarbréfi eða með aðkomu stefnuvotts sem felur í sér að viðtakandi kvittar fyrir móttöku. Frumvarpið gerir hins vegar ráð fyrir að það teljist nægjanlegt að skjölin séu birt í stafrænu pósthólfi viðkomandi á Ísland.is án þess að hann hafi staðfest að hann hafi séð þau.
Hætta á að fólk missi af kærufrestum og verði fyrir fjárhagslegum skaða
Guðmundur varaði við því að þessi breyting gæti valdið því að fólk sem ekki hefur aðgang að tölvu eða skortir tæknilæsi, sérstaklega eldra fólk og þeir sem glíma við fötlun eða veikindi, missi af mikilvægum tilkynningum. Afleiðingin geti orðið sú að einstaklingar standi frammi fyrir því að hafa glatað kærufresti eða verði fyrir fjárnámi og nauðungarsölu án þess að vita af málsmeðferðinni.
Hvetur almenning til að skrá tölvupóst og fylgjast með Ísland.is
Guðmundur hvatti þá sem hafa tök á að nýta stafræna þjónustu til að skrá tölvupóstfang sitt á Ísland.is svo að viðvörun berist þegar ný skjöl koma í stafræna pósthólfið. Hann mælti einnig með því að þeir sem ekki ráða við tæknina leiti aðstoðar aðstandenda eða umboðsmanna til að tryggja að ekkert mikilvægt fari fram hjá þeim.
Hlusta má á ítarlega umfjöllun í spilaranum hér að neðan.