Kemur ekkert „betra tilboð“
Það sem margir hollenskir bændur óttuðust og kom af stað stórfelldum mótmælum í sumar, er núna að fara að gerast. Með vísan til loftslagsdómsdags og köfnunarefnisreglna ESB hyggjast stjórnvöld í Hollandi kaupa og loka allt að 3.000 fullt starfandi matvælaframleiðandi bændabýlum. Segja yfirvöld að eina leiðin til að draga úr köfnunarefnismengun sé að farga stórum hluta eins hagkvæmasta matvælaframleiðanda heims.
Ef nægjanlega margir bændur fást ekki til að samþykkja tilboðið af „fúsum og frjálsum vilja“ með greiðslum „vel yfir“ verðmætinu, þá mun ríkisstjórnin grípa til þvingana. Köfnunarefnisráðherra Hollands Christian Van Der Wal lýsti því yfir að nauðungarkaup yrðu gerð með „sársauka í hjartanu.“ Hún sagði við þingmenn í síðustu viku:
„Það kemur ekkert betra tilboð.“
Nærtækast að farga allri bændastéttinni og leggja niður landbúnað
Til að fara eftir reglum ESB og markmiðum um að draga úr kolefnislosun, þá verður ríkisstjórn Hollands að ráðast á bændastéttina og kenna henni um hlýnun jarðar. Segja yfirvöld að landbúnaðurinn standi fyrir næstum helming þess köfnunarefnis sem landið gefur frá sér. Væri þá nærtækast að farga allri bændastéttinni og hætta að keyra bíla og draga Holland niður í myrkur hungursneyðar og fátæktar í anda Stalín og Mao Tsetung til að Holland efni heit sín til valdamanna í Brussel. Til að skreyta svipuna blóðugri göddum segja umhverfisyfirvöld í Hollandi að lífríkinu sé ógnað og margar tegundir hverfi hraðast í Hollandi miðað við önnur lönd. Setur þetta hollenska bændur í meistaraflokk glæpamanna sem vilja ganga af jörðinni dauðri með nytjun fjandsamlegra nautgripa sem ganga prumpandi útum allt Holland í þeim tilgangi einum að kæfa ráðherra ríkisstjórnarinnar.
Bændur segja, að áætlunin um að draga úr kolefnislosun samkvæmd Agenda 2030, muni kosta þá lífsviðurværi sitt og telja á hógværan, sannan og réttan hátt, að óréttmæt aðför sé gerð að landbúnaðinum sem atvinnugrein á meðan aðrar atvinnugreinar t.d. flugið fá að lifa áfram.
