Sarpur 4, ný útgáfa skráningar- og upplýsingakerfis fyrir íslenskan menningararf, var opnaður morgun af Loga Einarssyni, ráðherra menningar-, nýsköpunar- og háskólamála. Í tilkynningu segir að opnunin marki mikilvægt framfaraskref í stafrænum innviðum safna og styrkir bæði varðveislu og miðlun upplýsinga um menningararf þjóðarinnar.
Hjarta safnastarfsins endurnýjað
Sarpur hefur verið notaður frá árinu 1998 og er grundvallartæki í starfsemi safna um allt land. Kerfið nær yfir söfnun, varðveislu, skráningu, rannsóknir og miðlun og er nú notað af meira en 60 söfnum og stofnunum. Í Sarp eru skráðar um 1,7 milljónir færslna, allt frá listaverkum og ljósmyndum til fornleifa og þjóðhátta.
Byggt á alþjóðlega viðurkenndum hugbúnaði
Nýja útgáfan er byggð á MuseumPlus, alþjóðlega viðurkenndum hugbúnaði sem mörg helstu söfn Evrópu nota. Val á kerfinu byggði á umfangsmikilli þarfagreiningu og útboði á Evrópska efnahagssvæðinu.
Betri tengingar og nýir möguleikar
Sarpur 4 er hannaður til að tengjast öðrum lykilinnviðum, þar á meðal bókasafnakerfunum Gegni og Leitir.is, kortavefsjá Náttúrufræðistofnunar, island.is, þjóðskrá og fasteignaskrá. Sameiginleg nafnaskrá, staðarskrá og heimildaskrá stuðla að nánara samstarfi safna og auðvelda nýjar rannsóknir á menningararfinum. Þar að auki býður kerfið upp á öflugri leit, stuðning við bæði íslensku og ensku og fjölbreyttari miðlunarmöguleika.
Fjármögnuð uppfærsla í þágu menningararfs
Sarpur er í eigu Rekstrarfélags Sarps og rekið í samstarfi við Landskerfi bókasafna. Uppfærslan var fjármögnuð með styrk úr innviðasjóði í gegnum Miðstöð stafrænna hugvísinda og lista, öndvegisstyrk úr safnasjóði og eigin fjármunum Rekstrarfélags Sarps.
Hægt er að smella hér til að skoða Sarp.