Pétur Gunnlaugsson ræddi við Pétur Marteinsson, oddvita Samfylkingarinnar í Reykjavík, í Síðdegisútvarpinu um stöðu leikskólamála í borginni og hvaða leiðir séu færar til að bæta aðgengi barna að leikskólaplássi. Þar kom fram að hann telji leikskólana vera helsta jöfnunartæki samfélagsins og að sveitarfélagið verði sjálft að tryggja þjónustuna. Hlusta má á þáttinn í spilaranum hér að neðan.
Mönnun og húsnæði meginorsök vandans
Hann sagði að manneklan og húsnæðisskortur væru kjarni vandans, meðal annars vegna fjölgunar íbúa á undanförnum árum. Erfitt hefði reynst að manna stöður í leikskólum þrátt fyrir nýgerða kjarasamninga og húsnæðisvandi hefði haft áhrif á getu til að ráða starfsfólk.
Sveitarfélagið beri ábyrgð á þjónustunni
Hann sagðist ekki hlynntur fyrirtækjareknum leikskólum sem meginaðgerð þar sem það væri merki um að sveitarfélagið stæði ekki undir grunnþjónustu. Að hans mati gætu fyrirtæki hvorki leyst manneklu né húsnæðisvanda og því þyrfti borgin sjálf að tryggja rekstur og uppbyggingu leikskóla.
Telur heimagreiðslur myndu auka ójöfnuð
Hann sagði að heimagreiðslur til foreldra sem hefðu börn sín heima, gætu aukið félagslegan ójöfnuð og haft áhrif á þátttöku kvenna á vinnumarkaði. Mikilvægt væri að brúa bilið frá 12 mánaða aldri þar til börn komast á leikskóla og líta á leikskólastigið sem fyrsta stig menntakerfisins sem tryggi öllum börnum jafnan aðgang að undirbúningi fyrir grunnskóla.
Hlusta má á ítarlegri umfjöllun í spilaranum hér að neðan.