Tónlistarkonan Sjana Rut hefur gefið út breiðskífuna Raunheimar, sem er safn sagna frá fólki sem hún hefur kynnst á lífsleiðinni, ásamt eigin persónulegri reynslu. Í nýjasta laginu af plötunni má heyra einstaklega persónulega frásögn, en eins og nafnið á plötunni gefur til kynna eru öll lögin tengd raunverulegum atburðum og tilfinningum sem eiga sér stað í hinum svokölluðu „raunheimum.“
Sjana Rut samdi öll lög plötunnar sjálf og voru þau að mestu leyti tekin upp í Stúdíó Paradís. Mastering fór fram í hinu heimsþekkta Abbey Road Studios í London, undir handleiðslu Oli Morgan. Platan er blanda af þjóðlagatónlist og poppi, þar sem franskur þjóðlagastíll skín í gegn. Hægt er að ímynda sér hljóðheiminn sem þægilega stemningu sem gæti átt heima á kaffihúsi í París eða sem bakgrunnstónlist í ljúfu frönsku ævintýri.
Meðal þeirra sem koma fram á plötunni er Pálmi Sigurhjartarson sem leikur á harmonikku og píanó, Kjartan Baldursson sem spilar á gítar, og Jóhann Ásmundsson (úr Mezzoforte) sem spilar á kontrabassa. Upptökurnar fóru fram í Stúdíó Paradís þar sem Sjana Rut vann náið með Pálma og upptökustjóranum Ásmundi Jóhannssyni, sem sá um upptökur plötunnar.
Með útgáfu Raunheima hefur Sjana Rut skapað einstakt verk þar sem persónulegar frásagnir fléttast saman við fallegan hljóðheim innblásinn af franskri þjóðlagatónlist.
Hér að neðan má hlusta á eitt þeirra laga sem er á plötunni en um er að ræða nýjasta lag Sjönu Rutar.