Arnþrúður Karlsdóttir ræddi við Kristinn Sigurjónsson, rafmagns- og efnaverkfræðing og fyrrverandi háskólakennara í Síðdegisútvarpinu, um stöðu tæknimenntunar og áhrif hennar á atvinnustefnu landsins. Kristinn sagði að skortur á tæknimenntuðu starfsfólki hefði um árabil grafið undan gæðum bygginga og stórframkvæmda og torveldað hagkvæma nýtingu fjármuna í opinberum verkefnum. Hlusta má á þáttinn í spilaranum hér að neðan.
Hann sagði að á undanförnum áratugum hefði áhersla á bóklegt nám orðið of rík á kostnað iðn- og tæknigreina og að því hefði fylgt sú þróun að færri lærðu verkleg fög sem væru grundvöllur atvinnulífsins. Arnþrúður spurði hvort hann teldi að atvinnustefna og menntastefna stjórnvalda héldust í hendur og sagði Kristinn afdráttarlaust nei við þeirri spurningu.
Gagnrýnir að tækniskólar hafi verið sameinaðir háskólanámi
Kristinn gagnrýndi þá stefnu að leggja niður sérhæfða skóla fyrir iðn- og tæknigreinar og færa kennsluna alfarið undir Háskóla Reykjavíkur. Hann sagði að þar sætu nemendur með fjölbreyttan bakgrunn í sama námsumhverfi og að kröfur væru fyrst og fremst sniðnar að bóknámsnemum úr framhaldsskólum.
Að hans mati hefði þetta dregið úr möguleikum fólks með verklega hæfileika, oft úr iðnnámi, til að komast áfram í tæknifræði og öðrum sérgreinum þar sem verkvit og reynsla af iðngreinum skipti sköpum.
Skólakerfið ekki hannað fyrir drengi
Kristinn benti á að þessi staða sé uppi meðal annars vegna þess að skólakerfið hefði ekki tekið nægilegt mið af ólíkum styrkleikum nemenda, sérstaklega drengja sem hefðu gjarnan meira næmi fyrir myndrænni hugsun og verklegum greinum. Hann sagði að þegar áhugasvið þeirra væri ekki virt og kennslan einblíndi á bóklegt nám dragi það úr löngun drengja til að halda áfram í skóla eða þeir hættu fyrr án þess að nýta sína hæfileika. Kristinn segir þetta hafa áhrif á atvinnulífið, þar sem vanti sífellt fleiri tæknimenntaða starfsmenn til að vinna við innviði, orkuskipti og nýsköpun.
Áhrif á hagkvæmni framkvæmda
Að mati Kristins hefur skortur á faglegri verk- og tæknilegri þekkingu í opinberu stjórnkerfi einnig valdið því að stórframkvæmdir, svo sem brýr og mannvirki, verði oft mun dýrari en þyrfti og galla komi í ljós síðar. Hann nefndi dæmi um mannvirki á Reykjanesi og í Vestmannaeyjum þar sem vandamál hefðu mátt forðast ef meiri tæknileg þekking hefði verið nýtt í áætlun og framkvæmd. Kristinn hvatti stjórnvöld til að efla iðn- og tæknimenntun sem lykilþátt í atvinnustefnu og innviðauppbyggingu landsins.
Hlusta má á ítarlega umfjöllun í spilaranum hér að neðan.