Spá Guðrúnar Kristínar miðils: Efnahags og útlendingamálin sprengja ríkisstjórnina

Það er ekki langt í að dagar ríkisstjórnarinnar verði taldir því ýmislegt mun koma upp á til þess að veikja ríkisstjórnarsamstarfið enn meira en orðið er nú þegar. Því mun ríkisstjórnin springa inna skamms og verður bráðabirgðaríkisstjórn mynduð fram að kosningum sem fram fara samhliða forsetakosningnum. Þetta var meðal þess sem fram kom í spá Guðrúnar Kristínar Ívarsdóttur miðils í þætti Arnþrúðar Karlsdóttur.

Bætur til Grindvíkinga þegar þessi ríkisstjórn verður farin frá

Ríkisstjórninni mun ekki takast vel upp að með setja Grindvíkinga í forgang eins og sagt er að eigi að gera og heldur áfram að ausa peningum í verkefni erlendis og í málefni hælisleitenda hér heima. Því mun ganga illa fyrir Grindvíkinga að sækja bætur vegna tjóns og mun grípa um sig mikil reiði vegna þessa. Það koma einhverjar bætur en ekki verða allir sáttir við þau málalok og settir verða skattar á almenning vegna þessa. Bæturnar muni þó ekki fást fyrr en þessi ríkisstjórn er farin frá. Minna sé til í sjóðum en greint hafi verið frá.

Alþingiskosningar samhliða forsetakosningum

Guðrún segir ríkisstjórna springa vegna efnahagsmála sem og útlendingamála auk þess sem spillingarmál muni koma upp. Verið sé að fela ýmislegt fyrir almenningi til dæmis mál varðandi Íbúðalánasjóð. Þegar ríkisstjórnin springur verður mynduð bráðabirgðastjórn sem sitji þar til kosið verði en þær kosningar munu fara fram jafnvel samhliða forsetakosningum af hagkvæmnisástæðum.

Reiði innan Sjálfstæðisflokksins

Þá segir Guðrún að hún skynji mikla reiði innan Sjálfstæðisflokksins og það muni koma upp einhver mál sem varða Bjarna Benediktsson sem sé á útleið sem formaður. Þá muni einnig koma upp mál sem varða Sigurð Inga og Katrínu Jakobsdóttur og segir Guðrún þau tengjast einhverju sem sé erlendis.

Í þættinum ræddi Guðrún um kröfu Palestínumanna sem vilja að íslensk stjórnvöld flytji hingað inn fjölskyldur þeirra. Guðrún segir að það muni ekki ná fram að ganga. Það muni verða stoppað af og það sé eitt af því sem mögulega gæti haft áhrif á það að ríkisstjórnin springi.

Nota þarf augnskannan á Keflavíkurflugvelli

Varðandi hælisleitendamálin segir Guðrún að hún leggi áherslu á að augnskanninn verði tekinn aftur í notkun á Keflavíkurflugvelli. Hún segir að eitthvað eigi eftir að gerast hér á landi, mögulega einhver árás sem muni verða til þess að menn fari að endurskoða útlendingamálin því með þessu fólki fylgi aukning glæpa. Sú aukning bitni helst á hinu duglega fólki sem hingað hafi flutt til þess að leggja samfélaginu lið og sækja vinnu hér á landi.

Um lögregluna og málin þar innanhúss segir Guðrún að þar eigi eftir að koma upp hneykslismál sem tengist útlendingamálum.

Í síðari hluta þáttar hringdu hlustendur inn og spurðu Guðrúnu um þjóðfélagsmálin og meðal annars um hvort Katrín Jakosdóttir muni bjóða sig fram til forseta.

Hlusta má nánar á þáttinn í spilaranum hér að neðan til þess að heyra hvaða spurningar hlustendur báru upp.

Deila þessari frétt á samfélagsmiðla

Deila