Tommy Juhl Nielsen frá Noregi, Flemming Sonne frá Danmörku og Hulda Harðardóttir, Landspítala.
Landspítali tekur nú í fyrsta sinn þátt í sameiginlegu útboði krabbameinslyfja með Danmörku og Noregi með það að markmiði að tryggja stöðugt framboð lyfja sem sífellt reynist erfiðara að nálgast. Þetta kemur fram í tilkynningu frá Heilbrigðisráðuneytinu.
Lyfjaskortur hefur aukist á heimsvísu
Í tilkynningunni segir að á undanförnum árum hafi skortur á lyfjum vaxið á alþjóðavísu og haft áhrif á aðgengi sjúklinga að nauðsynlegri meðferð. Í tilkynningu frá Landspítala kemur fram að samnorræn útboð séu mikilvæg leið til að bregðast við þessari þróun og tryggja afhendingaröryggi. Krabbameinslyf eru oft keypt í litlu magni og því hefur það hamlað stöðugu framboði á smærri mörkuðum. Með því að sameina Ísland, Noreg og Danmörku í eitt útboðssvæði myndast stærri markaður sem eykur líkur á fleiri tilboðum og stöðugra aðgengi að lyfjum.
Smæð markaðar kallar á samstarf
Í tilkynningunni er bent á að smæð íslensks lyfjamarkaðar, með færri en 400.000 íbúa, geri það sérstaklega mikilvægt fyrir Ísland að taka þátt í alþjóðlegu samstarfi af þessu tagi. Reynsla síðustu ára sýni að slík samvinna hafi skilað auknum fjölda tilboða og bætt stöðu landsins í lyfjaöflun.
Fleiri svæði bætast við samstarfið
Danmörk, Noregur og Ísland hafa síðustu sjö ár, staðið að samnorrænum útboðum á mikilvægum lyfjum með góðum árangri. Nú er stefnt að því að víkka samstarfið enn frekar og bæta við einu fylki í Svíþjóð og einu í Finnlandi í næsta útboði. Markmiðið er að styrkja enn frekar sameiginlega stöðu ríkjanna gagnvart lyfjaframleiðendum og tryggja sjúklingum á Norðurlöndum öruggt og stöðugt aðgengi að nauðsynlegum lyfjum.