Arnþrúður Karlsdóttir og Pétur Gunnlaugsson ræddu við Arnór Sigurjónsson varnamálasérfræðing í Síðdegisútvarpinu um hervæðingu Evrópu og breytta stefnu Bandaríkjanna gagnvart stríðinu í Úkraínu. Hann sagði Evrópuríki hafa aukið fjárfestingu í varnarmálum með langtímaáætlunum til ársins 2030 en að uppbygging hernaðargetu tæki nokkur ár. Hlusta má á þáttinn í spilaranum hér að neðan.
Breytt afstaða Bandaríkjanna
Arnór benti á að stefna Bandaríkjanna hefði breyst í forsetatíð Donald Trump frá því sem var, þegar Joe Biden hafi verið forseti. Hann taldi bandarísk stjórnvöld nú leggja aukna áherslu á viðskiptalega hagsmuni og möguleika á samningum við Rússland fremur en áframhaldandi hernaðarstuðning við Úkraínu. Að hans mati gæti slík nálgun haft áhrif á framboð loftvarnavopna til Úkraínu sem Evrópuríki hefðu hingað til keypt frá Bandaríkjunum.
Spillingarmál í Úkraínu
Þá var rætt um spillingu innan úkraínska stjórnkerfisins og hvort Volodymyr Zelensky hefði gert fullnægjandi grein fyrir ráðstöfun fjármuna sem veittir hefðu verið til landsins. Arnþrúður nefndi í því sambandi að rannsóknir stæðu yfir á þingmönnum og fyrrverandi embættismönnum í innsta hring Zelensky í Úkraínu vegna gruns um misnotkun fjármuna. Arnór sagði úkraínsk stjórnvöld hafa sett á laggirnar sérstakar stofnanir til að takast á við spillingu en að vandinn væri áfram til staðar og þyrfti að taka tillit til hans í áframhaldandi stuðningi Vesturlanda.
Hlusta má á ítarlegri umfjöllun í spilaranum hér að neðan.