Átjándu vikuna í röð streymdu Gulvestungar út á götur í Frakklandi til að mótmæla bágbornum efnahagskjörum. Talsmenn Gulvestunga segja að hreyfingin geri nú úrslitakröfu til frönsku ríkisstjórnarinnar en s.k. ”þjóðarviðræðum“ Macron lýkur á morgun: ”Við tökum ekki mark á þjóðarumræðu Macron – hún breytir engu.” Brennandi bílar, brotnar rúður, steinkast, slagsmál, táragas og vatnsbyssur lögreglunnar einkenndu þennan laugardag. Líktist aðalverzlunargata Parísar vígvelli og dökkur reykur elda blandaðist hvítum táragasreyk lögreglunnar. Margir mótmælenda voru grímuklæddir og veifuðu franska fánanum. Yfir 5 þúsund lögreglumenn voru staðsettir við Champs-Élysées. Skv. fréttastofu TT minna mótmæli dagsins á ”lætin, þegar mótmælin byrjuðu fyrir 18 vikum síðan”. Tugir manns hafa verið handteknir og stjórnvöld sögðu í yfirlýsingu, að á annað þúsund skemmdarverkamanna hefðu blandað sér í mótmæli Gulvestunganna til að vinna spjöll.
