Guðmundur Ingi Kristinsson formaður Bótar.
Núverandi bótakerfi lífeyrisþega er stórlega gallað og býr til gildrur fyrir þá sem hyggjast neyta þess réttar, sem þeir sem þurfa á því að halda eiga að njóta. Þetta var meðal þess sem fram kom í máli Guðmundar Inga Kristinssonar formanns Bótar en hann var gestur Edithar Alvarsdóttur í síðdegisútvarpinu í gær ásamt Bergi Þorra Benjamínssyni formanni Sjálfsbjargar. Guðmundur bendir á að nýjasta dæmið um gildrur kerfisins séu nýju húsnæðisbótalögin “ það var fullt af fólki sem hafði bifreiðastyrki og styrki vegna lyfjakostnaðar, það var kannski að fá 30.000 krónur fyrir styrkjum fyrir bíl og lyfjakostnaði, svo var það skert króna á móti krónu vegna nýju húsnæðisbótalaganna„segir Guðmundur. Í þættinum fóru þeir félagar yfir þann ótrúlega frumskóg sem lífeyrisþegar þurfa að feta sig í gegnum og þær hindranir sem á vegi þeirra verða, hindrunum sem Guðmundur segir svo margar að þær sem nefndar voru í þættinum væru aðeins brot af þeim. Hlusta má á viðtalið í spilararnum hér fyrir neðan.