Margrét Steinarsdóttir framkvæmdastjóri Mannréttindaskrifstofu Íslands.
Engin alþjóðleg skilgreing er til um það hvað telst vera hatursorðræða. Þetta var meðal þess sem fram kom í máli Margrétar Steinarsdóttur framkvæmdastjóra Mannréttindaskrifstofu Íslands í síðdegisútvarpinu í dag en hún var gestur Arnþrúðar Karlsdóttur. Margrét bendir á að þær skilgreiningar sem til séu um stöðu minnihlutahópa snúi ekki að hatursorðræðu heldur kynþáttamisrétti “ það er skilgreining í samningi Sameinuðu þjóðanna gegn kynþáttamisrétti og það er líka til skilgreining sem Evrópusambandið hefur stuðst við sem snýr fyrst og fremst að þjóðernisuppruna og kynþætti, en alþjóðlega skilgreiningin á hatursorðræðu er ekki til“,segir Margrét.
Margrét ræddi nýútkomna skýrslu Evrópunefndar (ECRI) um kynþáttamisrétti og umburðarleysi en eins og kunnugt er koma fram í skýrslunni ásakanir um hatursorðræðu af hálfu Útvarps Sögu og sjónvarpsstöðvarinnar Omega. Í þættinum kom fram að skýrslan lá í hálft ár á borði Velferðarráðuneytisins í tíð Eyglóar Harðardóttur þáverandi félagsmálaráðherra en á þeim tíma átti ráðuneytið þess kost að gera athugasemdir við efni skýrslunar, sem það gerði ekki, þrátt fyrir þær alvarlegu ásakanir sem fram komu í henni í garð tilgreindra fjölmiðla.
Nafnleysingjar verndaðir í skýrslunni
Fram kom í máli Margrétar að ásakanirnar hafi ekki komið frá Mannréttindaskrifstofu Íslands en eins og kunnugt áttu menn á vegum ECRI í trúnaðarsamskiptum við ónafngreinda aðila hér á landi í tengslum við gerð skýrslunnar og því eiga þeir sem ásakaðir voru í skýrslunni ekki kost á að sækja rétt sinn gagnvart þeim aðilum bæri svo undir.