Ungur karlmaður hefur játað að hafa stungið annan mann með hnífi í Kjarnaskógi á Akureyri á föstudaginn langa. Maðurinn stakk fórnarlamb sitt tvívegis í lærið og var fórnarlambið flutt á sjúkrahús þar sem gert var að sárum þess. Fimm einstaklingar voru handteknir í kjölfarið vegna málsins, en tveir karlmenn og ein kona voru í framhaldinu úrskurðuð í gæsluvarðhald. Öllum sem í gæsluvarðhaldinu voru hefur verið sleppt og telst málið vera upplýst. Málið má rekja til deilna sem upp komu milli einstaklinganna sem allir þekkjast. Málið verður sent saksóknara til frekari meðferðar.