S-merkt lyf eru til dæmis sérhæfð, dýr og vandmeðfarin lyf, notuð á sjúkrahúsum eða í tengslum við þau vegna sérhæfðrar meðferðar og er ávísun þeirra háð ströngum skilyrðum. Leyfisskyld lyf eru lyf sem eingöngu eru notuð í samræmi við klínískar leiðbeiningar og eru að jafnaði kostnaðarsöm og vandmeðfarin.
Ákvörðunin tekur mið af þeim áherslum sem fram koma í þingsályktun um lyfjastefnu til ársins 2022 þar sem segir meðal annars: „Ferli ákvarðanatöku um notkun leyfisskyldra lyfja verði styrkt og unnið að bættu fyrirkomulagi á umsjón og eftirliti með afgreiðslu S-merktra og leyfisskyldra lyfja og tryggt verði betur að saman fari fagleg og fjárhagsleg ábyrgð með líkum hætti og annars staðar á Norðurlöndunum, einkum í Danmörku og Noregi.“ Landspítalanum hefur verið falið að hefja undirbúning að breytingunni í samráði við Sjúkratryggingar Íslands og heilbrigðisstofnanir.