Forsætisráðherrann Katrín Jakobsdóttir hefur í hyggju að setja af stað sérstaka aðgerðaráætlun gegn hatursorðræðu, ef marka má þingsályktunartillögu, sem fyrir liggur í samráðsgáttinni. Ætlunarverkið er sagt vera til þess að búa til betra samfélag. Verkfærið sem á að nota er meðal annars sérstakt mælaborð sem forsætisráðherra ætlar að hafa í sínum höndum til að stýra umræðunni. Ráðherrann getur fylgst með umræðunni hjá einstaklingum og fyrirtækjum og jafnvel látið njósna um þá vegna gruns um óskilgreinda hatursorðræðu.
Þeir sem lenda inn á radarinn í mælaborðinu geta átt von á því að lenda í fangelsi. Refsingin getur beinst gegn pólitískum andstæðingum og fá þá dæmda úr leik. Sömuleiðis geta fjölmiðlar og einstaklingar, sem hafa í frammi gagnrýni á vinnubrögð og verklag forsætisráðherrans, átt von á refsiaðgerðum með tilheyrandi afleiðingum.
Innleiðing á Stazi njósnakerfinu
Við erum sem sagt að opna fyrir þann möguleika að forsætisráðherra Íslands geti innleitt eftirlitskerfi eins og viðhaft var hjá Stazí í þýska Alþýðulýðveldinu til að fylgjast með skoðunum fólks og hatrinu gegn Austur-þýska Kommúnistaflokknum. Stazí hélt því blákalt fram á sínum tíma, að njósnakerfi þeirra væri til þess fallið að búa til betra samfélag.
Skerðir ekki mannréttindi með þingsályktunartillögu
Forsætisráðherrann má og á að vita, að mannréttindi verða ekki skert með þingsályktunartillögu. Samkvæmt 73. gr. stjskr. íslenska lýðveldisins eru allir (einnig forsætisráðherra) frjálsir skoðana sinna og sannfæringar. Hver maður á rétt á að láta í ljós hugsanir sínar þ.á.m. andúð sína og hatur gagnvart kommúnisma og öðrum tegundum af vinstrisinnuðu alræði og rétttrúnaði.