Bandaríski hagfræðingurinn Jeffrey Sachs heldur því fram í myndbandi að átökin í Úkraínu eigi rætur að rekja til atburða árið 2014 en ekki til innrásar Rússlands árið 2022. Hann segir þróun mála á undanförnum áratugum hafa mótast af utanríkisstefnu Bandaríkjanna og stækkun Atlantshafsbandalagsins.
Stjórnarskiptin 2014 eru upphaf stríðsins
Í myndbandinu rekur Sachs upphaf stríðsins til stjórnarskipta í Úkraínu árið 2014 sem hann segir hafa átt sér stað með stuðningi frá Bandaríkjunum. Að hans mati hafi sú þróun markað upphaf átaka sem síðar leiddu til víðtækra hernaðarátaka á svæðinu.
Hann bendir á að markmið bandarískra stjórnvalda hafi meðal annars falist í því að veikja stöðu Rússlands á alþjóðavettvangi og styrkja áhrifasvæði vestrænna ríkja í Austur-Evrópu.
Stækkun NATO olía á eldinn
Sachs telur að stækkun NATO hafi verið olía á eld í aukinni spennu á milli Rússlands og vestrænna ríkja á undanförnum árum. Hann segir að ítrekaðar viðvaranir um að slíkar aðgerðir gætu leitt til átaka hafi ekki verið teknar til greina og að það hafi haft áhrif á þróun mála í aðdraganda stríðsins.
Gagnrýnir stefnu Evrópuríkja
Í myndbandinu gagnrýnir Sachs einnig stjórnvöld í Þýskalandi, Frakklandi og Bretlandi og segir þau hafa haldið áfram stefnu sem hafi aukið á spennu í stað þess að stuðla að afvopnun og deilulausnum í Evrópu.
Hann segir að núverandi staða sé afleiðing margra ára stefnumótunar þar sem mistök og brostin loforð hafi haft áhrif á þróun mála og torveldað friðsamlega lausn deilunnar.
Horfa má á myndbandið hér að neðan.