Ríkisstjórnin hefur samþykkt, að tillögu forsætisráðherra og ferðamála- iðnaðar og nýsköpunarráðherra, að veita fjórar milljónir króna til samstarfs um að efla starf þriðja geirans og félagasamtaka hér á landi.
Gert er ráð fyrir að framlag ríkisins felist í aðstoð og fjárstuðningi við söfnun upplýsinga vegna rannsóknar á umfangi þriðja geirans og frumkvöðlastarfs innan hans, þátttöku í málþingum og öðrum sameiginlegum viðburðum og fjárframlagi til endurútgáfu handbókar um stjórnun og rekstur félagasamtaka.
Ráðherra ferðamála-, iðnaðar- og nýsköpunar, Almannaheill, samtök þriðja geirans, og Fræða- og þróunarsetur þriðja geirans við Háskóla Íslands, munu á næstu dögum undirrita viljayfirlýsingu um að vinna sameiginlega að eflingu félagslegs frumkvöðlastarfs og nýsköpunar. Viljayfirlýsingin er liður í starfi ríkisstjórnarinnar til eflingar á starfi félagasamtaka í samræmi við gildandi stjórnarsáttmála. Hún er einnig í samræmi við nýsköpunarstefnu fyrir Ísland þar sem m.a. kemur fram þörf á hugvitsdrifinni nýsköpun á öllum sviðum samfélagsins.
Samvinna aðila mun beinast að eftirfarandi verkefnum:
- Tilraunastofa fyrir nemendur af ólíkum fræðasviðum Háskóla Íslands með það að markmiði að finna nýjar félagslegar lausnir í velferðarmálum í samvinnu við félagasamtök og notendur.
- Vinnustofur um aðferðir við félagslega nýsköpun. Þær verða ætlaðar þeim sem eru að undirbúa stofnun nýrra félaga en einnig rótgrónum félögum sem ráðgera að leggja aukna áherslu á nýsköpunarverkefni.
- Stofnun upplýsingavefs sem er ætlaður íslenskum félagasamtökum og nýtist við daglega stjórnun en einnig við undirbúning og framkvæmd umbótaverkefna. Endurnýjun handbókar um stjórnun og rekstur félagasamtaka.
- Rannsókn á umfangi þriðja geirans á Íslandi og frumkvöðlastarfs sem þar fer fram.