Vigdís Hauksdóttir borgarfulltrúi Miðflokksins.
Vigdís Hauksdóttir borgarfulltrúi Miðflokksins ásamt fulltrúm minnihlutans í Reykjavík lagði fram á fundi forsætisnefndar borgarinnar í morgun tölvupósta frá Kjarafélagi viðskiptafræðinga og hagfræðinga þar sem fram koma upplýsingar sem Vigdís var sökuð um að hafa lekið af trúnaðarfundi. Í tölvupóstunum sem Útvarp Saga hefur undir höndum kemur fram hörð gagnrýni á viðbrögð meirihlutans við dómi í eineltismálinu fræga en í tölvupóstunum segir meðal annars “ Niðurstaða dómsins er áfellisdómur yfir stjórnunarháttum í Ráðhúsi Reykjavíkur og stjórnsýslu borgarinnar.“ „Engu að síður hafa tveir starfsmenn eineltisteymis Skóla- og frístundasviðs verið fengnir að forgöngu borgarritara til að rannsaka málið og er fjármálastjóranum gert, þvert gegn vilja sínum, að mæta á fundi vegna þessa. Hér er sem sagt áfram haldið máli sem þó er búið að dæma í, með afdráttarlausum orðum dómara um framkomu skrifstofustjóra í garð undirmanns.“ „Það er raunar fordæmalaust að skrifa þurfi borgarfulltrúum bréf til að upplýsa um stjórnunarvanda í Ráðhúsi Reykjavíkur og áframhaldandi aðför að starfsmanni þar, en þá er þess að geta að eitt af verkefnum borgarráðs er að hafa „umsjón með stjórnsýslu borgarinnar“, eins og segir í 46.gr. samþykkta um stjórn Reykjavíkurborgar, auk þess að „ráða starfsmenn í æðstu stjórnunarstöður hjá Reykjavíkurborg og veita þeim lausn frá störfum“, eins og segir í 73.gr. samþykktanna.“
Segja skrifstofustjóra borgarstjóra ekki vilja una niðurstöðu Héraðsdóms
Þá segir í tölvupósti sem barst frá kjarafélaginu eftir að bréf skrifstofustjóra borgarstjóra og og borgarstjórnar til forsætisnefndar hafði verið birt á mbl.is í gær “ “Lögmaður Reykjavíkurborgar vísaði ítrekað til þess sem fram hafði komið af hálfu fjármálastjórans haustið 2016, að fjármálastjórinn hefði þá sakað skrifstofustjórann um eineltistilburði.” „Rúmum mánuði eftir að héraðsdómur kvað upp afdráttarlausan úrskurð sinn og dæmdi Reykjavíkurborg til að greiða fjármálastjóranum miskabætur vegna framgöngu skrifstofustjórans, er áfram haldið og fjármálastjórinn boðaður á næsta fund eineltisteymis þann 18.júlí s.l. Þessu var einnig mótmælt og var þeim fundi frestað.“