Ursula von der Leyen, forseti framkvæmdastjórnar Evrópusambandsins, hefur sætt gagnrýni eftir að hún tilkynnti um helgina að sérstakur öryggisfundur um stöðuna í Íran yrði haldinn á í dag, mánudag þrátt fyrir að átökin hefðu brotist út um helgina.
Árásirnar á Íran hófust á laugardag. Í kjölfarið féllu æðsti leiðtogi Írans, Ali Khamenei, háttsettir embættismenn og fjöldi almennra borgara. Íran svaraði með umfangsmiklum eldflauga- og drónaárásum á Ísrael og bandarískar herstöðvar við Persaflóa, meðal annars í Barein, Kúveit, Katar og Sameinuðu arabísku furstadæmunum.
Von der Leyen sagði á samfélagsmiðlinum X að afar mikilvægt væri að koma í veg fyrir frekari stigmögnun og tryggja svæðisbundið öryggi. Hún bætti við að hún myndi kalla saman sérstakan fund svokallaðs öryggisráðs framkvæmdastjórnarinnar á mánudag.
Gagnrýni á skrifræði og viðbragðshraða
Tilkynningin vakti mikla athygli og þúsundir athugasemda birtust á samfélagsmiðlum þar sem brugðist var við því að fundurinn yrði ekki haldinn strax. Gagnrýnin beindist að skrifræðislegum viðbrögðum við alvarlegri alþjóðlegri öryggisógn. Margir töldu að Evrópusambandið sýndi skort á pólitískri festu og hraða á sama tíma og átökin hefðu þegar tekið á sig alvarlega mynd.
Ólík viðbrögð evrópskra ríkja
Frakkland, Þýskaland og Bretland lýstu því yfir í sameiginlegri yfirlýsingu að ríkin hefðu ekki tekið þátt í árásunum en fordæmdu gagnárásir Írans. Spánn og Noregur gagnrýndu aðgerðirnar harðar og sögðu þær auka hættu á frekari stigmögnun.
Rússland fordæmdi árásir Bandaríkjanna og Ísraels og vísaði til brota á alþjóðalögum og sáttmála Sameinuðu þjóðanna. Kínversk stjórnvöld kröfðust tafarlausrar stöðvunar hernaðaraðgerða og lögðu áherslu á að virða fullveldi og landhelgi Írans. Indland, Brasilía og Afríkuríkin hvöttu til aðgæslu.